चालु आवमा अर्थतन्त्रको आकार ६१ खर्ब नाघ्ने, प्रतिव्यक्ति आम्दानी १,५१७ डलर पुग्ने अनुमान

चालु आर्थिक वर्ष २०८१/८२ मा नेपालको अर्थतन्त्रको आकार ६१ खर्ब ७ अर्ब रुपैयाँ पुग्ने प्रारम्भिक अनुमान गरिएको छ। राष्ट्रिय तथ्याङ्क कार्यालयले बुधबार सार्वजनिक गरेको राष्ट्रिय लेखा अनुमानअनुसार, गत आव २०८०/८१ मा अर्थतन्त्रको आकार ५७ खर्ब ९ अर्ब थियो भने २०७९/८० मा ५३ खर्ब ६७ अर्ब रहेको थियो।

चालु आवमा आर्थिक वृद्धिदर ४.६१ प्रतिशत हुने अनुमान गरिएको छ। कृषि क्षेत्र ३.२८% र गैरकृषि क्षेत्र ४.२८% ले वृद्धि हुने अपेक्षा गरिएको छ। विद्युत तथा ग्याँस क्षेत्रमा सबैभन्दा बढी १३.८२% वृद्धि हुने देखिएको छ।

राष्ट्रिय तथ्याङ्क कार्यालयका अनुसार यस आवमा प्रतिव्यक्ति कुल गार्हस्थ्य उत्पादन (GDP) १,४९६ अमेरिकी डलर र प्रतिव्यक्ति कुल राष्ट्रिय आम्दानी १,५१७ अमेरिकी डलर पुग्नेछ। वैदेशिक रोजगारबाट प्राप्त विप्रेषणले GDP को २५.८९% हिस्सा ओगट्नेछ भने कुल राष्ट्रिय बचत ३६.२४% हुने अनुमान छ।

यस आवमा अन्तिम उपभोग खर्च GDP को ९३.४५%, निर्यात ८.७४% र आयात ३३.२३% रहने तथ्याङ्क सार्वजनिक गरिएको छ।