एनआईसी एशिया बैंकद्वारा ५ अर्बको ऋणपत्र निष्कासन

एनआईसी एशिया बैंक लिमिटेडले लगानीकर्ताहरूलाई आकर्षक अवसर प्रदान गर्दै ५ अर्ब रुपैयाँ बराबरको ‘७ प्रतिशत एनआईसी एशिया डिबेन्चर २०९१’ निष्कासन गर्ने भएको छ। आगामी चैत २५ गतेदेखि बिक्री खुला हुने यो ऋणपत्रमा १००० अंकित मूल्यका कुल ५० लाख कित्ता समावेश छन्। नेपाल धितोपत्र बोर्डले चैत १३ गते नै यसका लागि स्वीकृति दिइसकेको छ। बैंकले व्यक्तिगत र सर्वसाधारण दुवैलाई लक्षित गरी यो योजना ल्याएको हो।

यो ऋणपत्रको ६० प्रतिशत (३० लाख कित्ता) व्यक्तिगत तवरमा बिक्री हुने छ भने ४० प्रतिशत (२० लाख कित्ता) सर्वसाधारणका लागि उपलब्ध हुनेछ। थप १ लाख कित्ता सामूहिक लगानी कोषलाई छुट्याइएको छ। लगानीकर्ताले न्यूनतम २५ कित्तादेखि अधिकतम २५ लाख कित्तासम्म आवेदन दिन सक्नेछन्। १० वर्षे अवधिको यो ऋणपत्रमा वार्षिक ७ प्रतिशत ब्याजदर प्राप्त हुनेछ। आवेदन चैत २५ देखि २८ गतेसम्म खुला रहनेछ, र आवश्यक परे म्याद वैशाख ८ गतेसम्म थपिन सक्छ। निष्कासन तथा बिक्री प्रबन्धकको भूमिकामा प्रभु क्यापिटल लिमिटेड रहेको छ।