आदरणीय शेयरधनी महानुभावहरुः
यस साल्पा विकास बैंक लि.को मिति २०८३ साल जेठ २२ गते बसेको सञ्चालक समितिको ४७७ औं बैठकको निर्णय बमोजिम विकास बैंकको १४ औं वार्षिक साधारण सभा निम्न लिखित मिति, समय र स्थानमा देहायका विषयहरु उपर छलफल गरी निर्णय गर्न बस्ने भएकोले कम्पनी ऐन २०६३ को दफा ६७ को व्यवस्था अनुसार सम्पूर्ण शेयरधनी महानुभावहरुको जानकारी तथा उपस्थितिको लागि यो सूचना प्रकाशित गरिएको छ।
साधारण सभा हुने मिति, समय र स्थान
मितिः २०८३/०३/१५ गते।
स्थानः खोटाङ जिल्ला, दिक्तेल रुपाकोट मझुवागढी न.पा.वडा नं.२ स्थित शुभम फाउण्डेशनको परिसर।
समयः दिनको ११ बजे।
छलफलका विषयहरु
क. साधारण प्रस्तावहरु
- सञ्चालक समितिले तयार पारेको बैंकको आ.व. ०७८/७९ को वार्षिक प्रगती प्रतिवेदन उपर छलफल र अनुमोदन गर्ने।
- लेखापरीक्षकको प्रतिवेदन सहित २०८२ असार मसान्तसम्मको वासलात तथा आर्थिक वर्ष ०७८/७९ को नाफा नोक्सान हिसाब तथा नगद प्रवाह विवरण सहितको अनुसूचीहरु उपर छलफल र अनुमोदन गर्ने।
- बैंकको आ.व. ०७९/८० को लागि बाह्य लेखापरीक्षकको नियुक्ती र निजको पारिश्रमिक निर्धारण गर्ने।
- आगामी कार्यकालको लागि सञ्चालक समितिको चयन गर्ने।
ख. विशेष प्रस्तावहरु
- बैंकको हालको कार्यक्षेत्र बाहेक थप चार जिल्लामा बैंकको कार्यक्षेत्र विस्तार गर्ने प्रयोजन लगायत अन्य संशोधनका लागि नियमनकारी निकायबाट प्रबन्धपत्र तथा नियमावलीमा संशोधन, फेरबदल तथा थपघट गर्न निर्देशन भएमा आवश्यकता अनुसार संशोधन थपघट गर्न सञ्चालक समिति तथा सञ्चालक समितिले तोकेको व्यक्तिलाई अख्तियारी दिने।
- सञ्चालकहरुको सेवा सुविधा पुनरावलोकन गरी सोही बमोजिम नियमावलीको सम्बन्धित नियम संशोधन गर्ने।
- विविध।
आज्ञाले,
श्री योगेन्द्र पुन
प्रमुख कार्यकारी अधिकृत तथा कम्पनी सचिव
चौधौं वार्षिक साधारण सभा सम्बन्धी अन्य जानकारी
- चौधौं वार्षिक साधारण सभालाई ध्यानमा राखी मिति २०८३ असार ०३ गते बुधवार (१) एक दिन विकास बैंकको शेयरधनी दर्ता किताब बन्द (Book Closed) रहने छ। नेपाल स्टक एक्सचेन्ज लिमिटेडमा मिति २०८३ असार ०२ गते सम्म कारोबार भई प्रचलित कानून बमोजिम यस विकास बैंकको शेयर रजिष्ट्रार ग्लोबल आइएमई क्यापिटल लि. (Global IME Capital Ltd.) लक्ष्मण बाबु भवन, नक्साल, काठमाण्डौमा प्राप्त नामसारीका किताबमा शेयरधनीहरुको नाम दर्ता भई कायम शेयरधनीहरुले मात्र सभामा भाग लिन सक्नेछन्।
- वार्षिक साधारण सभामा भाग लिन आउनुहुने सम्पूर्ण शेयरधनी महानुभावहरुले आफ्नो परिचय खुल्ने प्रमाणपत्र वा सोको प्रतिलिपि अनिवार्य रुपमा साथमा लिई आउनुहुन अनुरोध छ।
- शेयरधनी महानुभावहरुले उपस्थिति पुस्तिकामा दस्तखत गर्न शेयरधनी उपस्थिति पुस्तिका वार्षिक साधारण सभा हुने दिन बिहान ९:०० बजे देखी खुल्ला रहनेछ।
- छलफलका विषयहरु मध्ये विविध शिर्षक अन्तर्गत कुनै प्रस्ताव भैमा छलफल गर्न इच्छुक शेयरधनीले साधारण सभा हुनुभन्दा ७ (सात) दिन अगावै छलफलको विषयको जानकारी कम्पनी सचिव मार्फत सञ्चालक समितिको अध्यक्षलाई लिखित रुपमा दिनु पर्नेछ।
- साधारण सभामा भाग लिनका लागि प्रतिनिधि (प्रोक्सी) नियुक्ति गर्न इच्छुक शेयरधनीहरुले, प्रचलित कम्पनी कानूनले तोकेको ढाँचामा प्रतिनिधि (प्रोक्सी) फारम भरी सभा शुरु हुनु भन्दा कम्तिमा ४८ घण्टा अगावै बैंकको केन्द्रीय कार्यालय दिक्तेल खोटाङमा दर्ता गराई सक्नु पर्नेछ। बैंकको शेयरधनी बाहेक अरुलाई प्रोक्सी दिनु पर्ने र एक भन्दा बढी व्यक्तिलाई आफ्नो शेयर विभाजन गरी तथा अन्य कुनै किसिमबाट छुट्याई प्रोक्सी दिन पाइने छैन। यसरी दिएको प्रोक्सी बदर हुने छ।
- प्रोक्सी नियुक्ति गरी सक्नु भएको शेयरधनी आफै सभामा उपस्थित भई हाजिर पुस्तिकामा दस्तखत गर्नु भएमा निजले दिएको प्रोक्सी स्वतः बदर हुनेछ।
- एकै शेयरधनीले एक भन्दा बढी प्रोक्सीहरु दिइसकेको अवस्थामा यस अघि दिइएका सबै प्रोक्सी बदर गरी पछिल्लो प्रोक्सीलाई मान्यता दिइयोस् भनी छुट्टै लेखी साधारण सभा शुरु हुनु ४८ घण्टा अगावै दर्ता गराएको अवस्थामा, अघिल्ला प्रोक्सीहरु स्वतः बदर भएको मानी, पछिल्लो प्रोक्सीलाई मान्यता दिइनेछ।
- नाबालक शेयरधनीको सन्दर्भमा, शेयरधनी दर्ता किताबमा संरक्षकको रुपमा नाम लेखिएको व्यक्तिले मात्र संरक्षकको हैसियतले सभामा भाग लिन, छलफल गर्न, प्रतिनिधि नियुक्त गर्न र मतदान गर्न समेत सक्नु हुनेछ।
- वार्षिक साधारण सभामा शेयरधनीहरुबाट उठेका प्रश्न, जिज्ञासा वा मन्तव्यहरुको सम्बन्धमा सञ्चालक समितिको तर्फबाट सभाका अध्यक्ष वा अध्यक्षबाट तोकिएको व्यक्तिले जवाफ दिनु हुनेछ।
