टक्सार पिखुवा खोला हाइड्रोपावरको आईपीओ फागुन २७ बाट खुल्दै

टक्सार पिखुवा खोला हाइड्रोपावर लिमिटेडले आगामी फागुन २७ गतेदेखि प्रारम्भिक सार्वजनिक निष्कासन (आईपीओ) जारी गर्ने भएको छ। कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूलाई लक्षित गर्दै आईपीओ ल्याउन लागेको हो।

कम्पनीले जारी पूँजी १ अर्ब २० करोड रुपैयाँको ३५.२६ प्रतिशत बराबरको ४२ करोड ३० लाख ६६ हजार ८०० रुपैयाँ मूल्यका ४२ लाख ३० हजार ६६८ कित्ता साधारण शेयर निष्कासन गर्न अनुमति पाएको छ। यसमध्ये १२ लाख कित्ता शेयर आयोजना प्रभावित क्षेत्रका स्थानीय बासिन्दाका लागि छुट्याइएको छ, जसका लागि भोजपुर जिल्लाका बासिन्दाले आवेदन दिन सक्नेछन्।

त्यसैगरी, सर्वसाधारणतर्फ छुट्याइएका शेयरमध्ये १० प्रतिशत अर्थात ३ लाख ३ हजार ६७ कित्ता वैदेशिक रोजगारीमा रहेका नेपालीहरूका लागि सुरक्षित गरिएको छ। साथै, सामूहिक लगानी कोषका लागि १ लाख ५१ हजार ५३३ कित्ता र कम्पनीका कर्मचारीका लागि ६० हजार ६१३ कित्ता शेयर छुट्याइएको छ।

आईपीओमा न्यूनतम १० कित्तादेखि अधिकतम ५० हजार कित्तासम्म आवेदन दिन सकिने व्यवस्था गरिएको छ। आयोजना प्रभावित क्षेत्रका स्थानीय बासिन्दाका लागि आवेदन छिटोमा चैत ११ गते र ढिलोमा चैत २६ गतेसम्म खुला रहनेछ। वैदेशिक रोजगारीमा रहेका नेपालीहरूका लागि भने छिटोमा चैत १ गते र ढिलोमा चैत ११ गतेसम्म आवेदन दिन सकिनेछ।

कम्पनीको वित्तीय अवस्थाको मूल्याङ्कन गर्दै केयर रेटिङ्ग नेपालले ‘केयर एनपी डबल बी प्लस’ इस्यूअर रेटिङ प्रदान गरेको छ। यसले कम्पनीको दायित्व वहन क्षमतामा औसत स्तरको जोखिम रहेको संकेत गर्दछ।

कम्पनीले सञ्चालन गरिरहेको ८ मेगावाट क्षमताको जलविद्युत आयोजनाको कुल लागत १ अर्ब ८८ करोड २१ लाख रुपैयाँ रहेको छ। प्रतिमेगावाट लागत २३ करोड ५३ लाख रुपैयाँ रहेको यो आयोजनाको विद्युत उत्पादन अनुमति अवधि अझै २५ वर्ष ४ महिना बाँकी छ। आयोजनाको साधारण लगानी फिर्ता अवधि ९.१७ वर्ष र डिस्काउन्टमा फिर्ता अवधि १८.३७ वर्ष रहेको कम्पनीले जनाएको छ।

आईपीओ निष्कासन तथा बिक्री व्यवस्थापनको जिम्मेवारी प्रभु क्यापिटल लिमिटेडले लिएको छ। स्थानीय बासिन्दाले प्रभु क्यापिटल, आयोजना कार्यालय भोजपुर, प्रभु बैंक लिमिटेडका भोजपुर, प्याउली, हटुवागढी शाखा तथा सिटिजन्स बैंक इन्टरनेशनल लिमिटेडको भोजपुर शाखाबाट आवेदन दिन सक्नेछन्। आवेदन फारामका लागि स्थानीय बासिन्दाले २ रुपैयाँ शुल्क तिर्नुपर्नेछ।

वैदेशिक रोजगारीमा रहेका नेपालीहरूले नेपाल धितोपत्र बोर्डबाट स्वीकृति प्राप्त बैंक तथा वित्तीय संस्थामार्फत ‘सि–आस्बा’ प्रणाली प्रयोग गरी सहज रूपमा आवेदन दिन सक्ने व्यवस्था गरिएको छ।