नेपाल राष्ट्र बैंकले वित्तीय पहुँच विस्तारको नीतिहरू सार्वजनिक गर्यो

नेपाल राष्ट्र बैंकले वित्तीय पहुँच विस्तार गर्ने उद्देश्यले १३ नीतिहरू सार्वजनिक गरेको छ। केन्द्रीय बैंकले यी नीतिहरूबाट वित्तीय समावेशीकरणमा वृद्धि हुने आशा गरेको छ।

केन्द्रीय बैंकले समावेशी वित्तीय पहुँच, वित्तीय साक्षरता, वित्तीय शिक्षा, डिजिटल प्रविधिमा नवप्रवर्तन, लघु साना तथा मझौला उद्योग/व्यवसायलाई प्रवर्धन गर्ने नीति अघि सारेको छ। यस्तै, लैंगिक तथा वातावरणमैत्री बैंकिङ्ग प्रवर्द्धन, दिगो र फराकिलो आर्थिक विकास, वित्तीय पूर्वाधारको विकास, वित्तीय आचरणसम्बन्धी नियामकीय भूमिका, साझेदारी र सहकार्य, तथ्यांक संकलन, विश्लेषण तथा मूल्यांकन, र आवधिक सर्वेक्षण तथा मापन मार्फत वित्तीय समावेशीकरण बढाउने नीतिहरू पनि समेटिएका छन्।

नेपालमा औपचारिक वित्तीय सेवाको सुरुआत १९९४ मा नेपाल बैंकको स्थापनासँगै भएको हो। नेपाल राष्ट्र बैंकको २०७८ मा गरिएको अध्ययन प्रतिवेदन अनुसार २०७७ असार महिनासम्म कम्तीमा एक व्यक्ति एक खाताको आधारमा ६७.३ प्रतिशत जनसंख्याको बैंक तथा वित्तीय संस्थामा खाता रहेको देखिएको छ।

नेपाल राष्ट्र बैंकले २०७६ मा गरेको संक्षिप्त अध्ययन प्रतिवेदनमा नेपालको कुल जनसंख्याको ६०.९ प्रतिशत जनसंख्या औपचारिक वित्तीय सेवामा समावेश भएको देखिएको थियो। यस नीतिहरूको कार्यान्वयनले वित्तीय समावेशीकरणमा महत्वपूर्ण प्रगति हुने विश्वास गरिएको छ।