काठमाडौं — प्राथमिक सार्वजनिक निष्कासन (आईपीओ) का लागि नेपाल धितोपत्र बोर्डमा आवेदन दिने कम्पनीको संख्या १०४ पुगेको छ। बोर्डको पछिल्लो विवरणअनुसार यी कम्पनीले कुल ४७ करोड २८ लाख कित्ता सेयर निष्कासनका लागि प्रक्रिया अघि बढाएका छन्।
आईपीओको पर्खाइमा रहेका कम्पनीमध्ये केही ठूला कम्पनीको हिस्सा उल्लेख्य देखिएको छ। कुल प्रस्तावित सेयरमध्ये २५ प्रतिशतभन्दा बढी हिस्सा पाँच कम्पनीको मात्रै छ। यी पाँच कम्पनीले मात्रै करिब साढे ११ करोड कित्ता सेयर निष्कासनको तयारी गरेका छन्।
ठूला पाँच कम्पनीमध्ये तीन वटा उत्पादनमूलक क्षेत्रका हुन्। बाँकीमध्ये एउटा जलविद्युत् र अर्को सेवा क्षेत्रको कम्पनी हो। उत्पादनमूलक क्षेत्रका शुभश्री अग्नि सिमेन्ट, जगदम्बा स्टिल र महाशक्ति सिमेन्टले मात्रै करिब ६ करोड कित्ता सेयर निष्कासनका लागि आवेदन दिएका छन्।
प्रस्तावित कित्ताका आधारमा सिउरी न्यादी हाइड्रोपावर सबैभन्दा अगाडि छ। कम्पनीले प्रतिकित्ता १०० रुपैयाँ अंकित मूल्यमा ३ करोड ३ लाख कित्ता सेयर जारी गर्न अनुमति मागेको छ। यसको कुल निष्कासन आकार ३ अर्ब ३ करोड रुपैयाँ बराबर हुन्छ।
त्यसपछि शुभश्री अग्नि सिमेन्टले २ करोड २ लाख कित्ता सेयर निष्कासनको प्रक्रिया अघि बढाएको छ। प्रतिकित्ता १०० रुपैयाँका दरले कम्पनीको प्रस्तावित आईपीओ आकार २ अर्ब २ करोड रुपैयाँ बराबर छ।
जगदम्बा स्टिलले भने प्रिमियममा आईपीओ जारी गर्न आवेदन दिएको छ। कम्पनीले प्रतिकित्ता ३३० रुपैयाँका दरले २ करोड २ लाख कित्ता सेयर निष्कासन गर्न खोजेको छ। यसअनुसार कम्पनीको प्रस्तावित निष्कासन रकम ६ अर्ब ६२ करोड रुपैयाँ पुग्छ।
सेवा क्षेत्रको डिस मिडिया नेटवर्क पनि ठूलो आईपीओको तयारीमा छ। कम्पनीले प्रतिकित्ता १०० रुपैयाँमा १ करोड १७ लाख कित्ता सेयर जारी गर्न बोर्डको स्वीकृति पर्खिरहेको छ। यसको निष्कासन आकार १ अर्ब १७ करोड रुपैयाँ बराबर छ।
त्यस्तै, महाशक्ति सिमेन्टले १ करोड ७८ लाख कित्ता सेयर निष्कासनका लागि आवेदन दिएको छ। प्रतिकित्ता १०० रुपैयाँका आधारमा कम्पनीले १ अर्ब ७८ करोड रुपैयाँ बराबरको आईपीओ ल्याउने तयारी गरेको हो।
बोर्डमा ठूलो संख्यामा कम्पनी आईपीओ स्वीकृतिको पर्खाइमा रहे पनि प्रस्तावित निष्कासनमा सीमित ठूला कम्पनीको हिस्सा उल्लेख्य देखिएको छ। विशेषगरी उत्पादनमूलक क्षेत्रका कम्पनीको बढ्दो उपस्थिति आगामी सार्वजनिक निष्कासन बजारको महत्वपूर्ण पक्षका रूपमा देखिएको छ।
