बडादशैँ आजदेखि सुरु, घटस्थापनाको साइत ९:१६ बजे
Author
NEPSE trading

प्रत्येक वर्ष आश्विन शुक्ल प्रतिपदादेखि सुरु हुने हिन्दु नेपालीको महान् पर्व बडादशैँ आजदेखि सुरु भएको छ। यो पर्व आश्विन शुक्ल पूर्णिमासम्म १५ दिन धुमधामका साथ मनाउने चलन छ। बडादशैँको पहिलो दिन आज घरघरमा विधिपूर्वक घटस्थापना गरिएको छ।
घटस्थापना: आज बिहान ९:१६ बजे घटस्थापनाको साइत रहेको थियो। पूजा कोठा वा दशैँ घरमा कलश स्थापनासहित देवी दुर्गाको आह्वान गरि पूजा गरिएको छ। घटस्थापनाका दिन विशेषगरी जमरा राख्ने चलन छ। नजिकको चोखो स्थानबाट माटो ल्याएर गाईको गोबरले लिपपोत गरी जौ रोपिन्छ, जसलाई विजयादशमीको दिन समृद्धिको प्रतीकका रूपमा ग्रहण गरिन्छ।
नवरात्र पूजा: बडादशैँको नौ दिनमा नौ दुर्गाका रूप शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि, महागौरी, र सिद्धिदात्रीको विशेष पूजाआजा गरिन्छ। प्रत्येक दिन छुट्टाछुट्टै देवीको आह्वान र पूजा विधिपूर्वक सम्पन्न हुन्छ।
विजयादशमीको साइत: असोज २६ गते विजयादशमीको दिन टीका र जमरा ग्रहणको उत्तम साइत ११:३६ बजे रहेको छ। यस दिन देवीको प्रसाद ग्रहण गरिन्छ। विजयादशमीदेखि कोजाग्रत पूर्णिमासम्म देवीको पूजा र प्रसाद ग्रहण गर्ने परम्परा छ।
दशैँ पर्व असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा हिन्दु धर्मावलम्बीहरूले मनाउने गरेको छ।