निक्षेप वृद्धि तीव्र, निजी क्षेत्रमा कर्जा विस्तार सुस्त

काठमाडौँ । बैंक तथा वित्तीय संस्थामा निक्षेप उल्लेख्य रूपमा बढिरहँदा निजी क्षेत्रमा कर्जा विस्तार भने अपेक्षाकृत सुस्त देखिएको छ। चालु आर्थिक वर्षको फागुन मसान्तसम्म निक्षेप ६.६ प्रतिशतले बढेर ७७ खर्ब ४५ अर्ब ८८ करोड रुपैयाँ पुगेको छ, जुन अघिल्लो वर्षको सोही अवधिको ४.३ प्रतिशत वृद्धिभन्दा उच्च हो। वार्षिक आधारमा निक्षेप १५.१ प्रतिशतले बढेको छ। तर, निजी क्षेत्रमा कर्जा प्रवाह ४.४ प्रतिशत मात्रै बढेर ५७ खर्ब ४१ अर्ब २४ करोड रुपैयाँ पुगेको छ, जुन अघिल्लो वर्षको ६ प्रतिशतको तुलनामा कमजोर वृद्धि हो। यसले बैंकिङ प्रणालीमा तरलता बढ्दै गए पनि कर्जा माग अपेक्षाकृत कम रहेको र समग्र आर्थिक गतिविधि सुस्त रहेको संकेत गर्दछ। कर्जाको ठूलो हिस्सा गैर–वित्तीय संस्थागत क्षेत्रमा ६२.७ प्रतिशत र व्यक्तिगत तथा घरपरिवार क्षेत्रमा ३७.३ प्रतिशत रहेको छ। साथै, कर्जा वृद्धि उपभोग, निर्माण, यातायात तथा औद्योगिक क्षेत्रमा देखिएको भए पनि कृषि तथा वित्त–बीमा क्षेत्रतर्फ कर्जा घटेको छ। निक्षेप संरचनामा बचत र चल्ती निक्षेपको हिस्सा बढ्दा मुद्दती निक्षेप घटेको देखिन्छ।