आगामी वर्षको बजेट १८ खर्ब ६० अर्ब

काठमाडौँ: सरकारले आगामी वर्षका लागि १८ खर्ब ६० अर्ब ३० करोड रुपैयाँ विनियोजन गरेको छ। कूल विनियोजनमध्ये सरकारले चालूतर्फ ११ खर्ब ४० अर्ब ६६ करोड रुपैयाँ विनियोजन गरेको छ, जसले कूल बजेटको ६१.३१ प्रतिशत हिस्सा ओगटेको छ।

यसका साथै, पुँजीगत खर्चतर्फ ३ खर्ब ५२ अर्ब ३५ करोड रुपैयाँ विनियोजन गरिएको छ, जुन कूल बजेटको १८.९४ प्रतिशत हो। वित्तीय व्यवस्थापनतर्फ ३ खर्ब ६७ अर्ब १८ करोड रुपैयाँ विनियोजन गरिएको छ, जसले कूल बजेटको १९.७४ प्रतिशत हिस्सा ओगटेको छ।

यो खर्च अनुमान चालू वर्षको तुलनामा ६.२ प्रतिशतले बढी हो भने संशोधित अनुमानको तुलनामा २१.५६ प्रतिशत बढी हो। यसले आर्थिक गतिविधि, पूर्वाधार विकास र सार्वजनिक सेवाहरूको सुदृढीकरणमा सरकारको प्रतिबद्धता प्रकट गर्दछ।

चालू र पुँजीगत खर्चतर्फको महत्वपूर्ण विनियोजनले देशको समग्र आर्थिक वृद्धि र विकासलाई प्रवर्द्धन गर्न नयाँ परियोजनाहरू सुरु गर्ने र चलिरहेका परियोजनाहरूलाई निरन्तरता दिने उद्देश्य राखेको छ। बजेटले शिक्षा, स्वास्थ्य, पूर्वाधार र आर्थिक सुधार जस्ता महत्वपूर्ण क्षेत्रहरूलाई सम्बोधन गर्ने अपेक्षा गरिएको छ।

यस वर्ष सरकारले प्रदेश र स्थानीय तहमा ४ खर्ब ८ अर्ब २७ करोड रुपैयाँ हस्तान्तरण गर्दैछ । अघिल्लो वर्ष ४ खर्ब ८ अर्ब रुपैयाँ हस्तान्तरण भएको थियो ।

खर्च बेहोर्ने स्रोततर्फ राजस्वबाट सरकारले १२ खर्ब ६० अर्ब ३० करोड संकलन गर्ने लक्ष्य राखेको छ । यस वर्ष राजस्व १२ खर्ब ४८ अर्ब ६२ करोड संकलनको लक्ष्य राखेको छ ।

आन्तरिक ऋणबाट ३ खर्ब ३० अर्ब संकलन गर्ने लक्ष्य रहेको छ । वैदेशिक ऋणबाट २ खर्ब १७ अर्ब ६७ करोड र वैदेशिक अनुदानबाट ५२ अर्ब ३३ करोड जुटाउने अर्थ मन्त्री वर्षमान पुनले जानकारी दिए ।