सरकारले आगामी १० वर्षमा ३० खर्बको सूचना प्रविधि निर्यात गर्ने

सरकारले आगामी १० वर्षमा ३० खर्बको सूचना प्रविधि निर्यात गर्ने लक्ष्य तय गरेको छ। आगामी आर्थिक वर्षको बजेटमार्फत सरकारले ५ लाख प्रत्यक्ष र १० लाख अप्रत्यक्ष रोजगारी सृजना गर्ने लक्ष्यसहित ३० खर्बको प्रविधि निर्यात गर्ने लक्ष्य तय गरेको हो।

अर्थमन्त्री वर्षमान पुनले बजेट प्रस्तुत गर्दै आगामी दशकलाई ‘सूचना प्रविधिको दशक’ प्रस्थान वर्षका रूपमा अघि बढाउने बताए। सरकारले सूचना प्रविधिलाई अर्थतन्त्रको मेरुदण्डका रूपमा अघि बढाउने, डाटा सेन्टर स्थापना, बौद्धिक सम्पत्ति सुरक्षा लगायतका योजनाहरू बनाएको छ। यी आयोजना लागि ५९ करोड विनियोजन भएको छ।

काठमाडौँ उपत्यका र बुटवलमा उपलब्ध सरकारी र निजी भवनहरू प्रयोग गरेर सूचना प्रविधि पार्क स्थापना गर्ने योजना रहेको छ। यस्ता पार्कमा ३ वर्षका लागि वर्क हब बनाउने योजना सरकारको छ। ललितपुरको खुमलटारमा ज्ञान पार्क स्थापना गर्न १७ करोड विनियोजन भएको छ। विद्युतीय तथ्याङ्कको भण्डारण र तथ्याङ्कलाई भरपर्दो बनाउनका लागि पनि कदम चालिएका छन्। सूचना प्रविधि क्षेत्रमा पढिरहेका युवाहरूलाई इन्टर्नको व्यवस्था गरिनेछ।

यस कदमले नेपालमा सूचना प्रविधि उद्योगलाई बढावा दिने, उल्लेखनीय रोजगार अवसरहरू सिर्जना गर्ने र देशको आर्थिक वृद्धिमा महत्वपूर्ण योगदान पुर्याउने अपेक्षा गरिएको छ।