सरकारले १० अर्ब रुपैयाँ आन्तरिक ऋण उठाउने, ८ वर्षे विकास ऋणपत्र बोलकबोलमार्फत निष्कासन

सरकारले १० अर्ब रुपैयाँ बराबरको आन्तरिक ऋण उठाउने भएको छ। यसका लागि नेपाल सरकारले ८ वर्षे विकास ऋणपत्र–२०८० बोलकबोल प्रक्रियामार्फत निष्कासन गर्न लागेको हो। अर्थ मन्त्रालयअन्तर्गतको सार्वजनिक ऋण व्यवस्थापन कार्यालय ले सोमबार एक सूचना जारी गर्दै उक्त ऋणपत्र बिक्री प्रक्रिया अघि बढाइएको जानकारी दिएको छ।

सूचनाअनुसार नेपाल सरकारको एक हजार करोड रुपैयाँ बराबरको ८ वर्षे विकास ऋणपत्र बोलकबोल प्रणालीमार्फत निष्कासन गरिनेछ। यस बोलकबोल प्रक्रियामा सहभागी हुन इच्छुक बैंक तथा वित्तीय संस्थाहरूले कार्यालयको आधिकारिक वेबसाइटमार्फत अनलाइन आवेदन दिनुपर्नेछ। बोलकबोलका क्रममा ब्याजदर, लगानी रकम तथा अन्य आवश्यक विवरणहरू अनलाइन प्रणालीमै उल्लेख गर्नुपर्ने व्यवस्था गरिएको छ।

सार्वजनिक ऋण व्यवस्थापन कार्यालयका अनुसार बोलकबोलसँग सम्बन्धित विस्तृत नियम, प्रक्रिया तथा अन्य आवश्यक जानकारी कार्यालयको वेबसाइटमा उपलब्ध छ। सहभागी संस्थाहरूलाई सोही आधारमा प्रक्रिया अघि बढाउन आग्रह गरिएको छ।

नेपाल सरकारले आन्तरिक स्रोतबाट ऋण परिचालनलाई प्रभावकारी बनाउने लक्ष्यसहित समय–समयमा विकास ऋणपत्र निष्कासन गर्दै आएको छ। यस्ता ऋणपत्रमार्फत सरकारी विकास खर्च व्यवस्थापन गर्न तथा दीर्घकालीन वित्तीय सन्तुलन कायम गर्न सहयोग पुग्ने अपेक्षा गरिएको छ।