हेटौँडा सिमेन्ट उद्योग आर्थिक सङ्कटमा, उत्पादन ठप्प

हेटौँडा सिमेन्ट उद्योग उपकरण बिग्रिएपछि आर्थिक सङ्कटमा परेको छ। गत असोज १५ गतेदेखि उत्पादन ठप्प हुँदा उद्योगमा आर्थिक समस्या झन् गहिरिएको हो। उद्योगले उत्पादन बन्द भए पनि प्रशासनिक खर्च, कर्मचारीको तलबभत्ता र इन्धन खर्च जस्ता नियमित खर्चहरू रोकिएका छैनन्।

यसले आर्थिक भार थप बढाएको उद्योग व्यवस्थापनले जनाएको छ। आर्थिक अभावका बीच उपकरण मर्मत सम्पन्न हुनेबित्तिकै उत्पादन सुरु गर्ने तयारी भएको उद्योगले जनाएको छ । मर्मत कार्यका लागि भारतबाट प्राविधिक झिकाउनुपर्ने भएकाले समय लागेको छ।

आर्थिक अभावका कारण यसअघि पनि दुई महिना उद्योग बन्द भएको थियो। यस वर्ष भदौको तेस्रो सातादेखि पुन उत्पादन सुरु गरेको उद्योगले छोटो अवधिमा ६५ हजार बोरा सिमेन्ट उत्पादन गरेको थियो। तर, उत्पादन फेरि ठप्प भएपछि आर्थिक सङ्कट झन् जटिल बन्दै गएको छ। उद्योग सञ्चालनमा ल्याउन र वित्तीय समस्याको समाधान गर्न सरकार र अन्य सरोकारवालाहरूको ध्यानाकर्षण आवश्यक रहेको देखिन्छ।