आइतवार धितोपत्र बोर्डको अध्यक्ष चयनका लागि अन्तरवार्ता: निष्पक्षता र नेतृत्वको प्रतीक्षा

नेपालको पुँजी बजार नियमन गर्ने सर्वोच्च निकाय धितोपत्र बोर्डको कार्यकारी अध्यक्ष चयन प्रक्रिया लामो अन्योलपछि फेरि अघि बढाइएको छ। अर्थ मन्त्रालयले यसपटक तीन उम्मेदवारलाई २०८१ मंसिर ९ गते अन्तर्वार्ता र व्यावसायिक कार्ययोजनाको प्रस्तुतीकरणका लागि बोलाएको छ।

तीन प्रमुख उम्मेदवारको प्रतिस्पर्धा

अध्यक्षका लागि प्रतिस्पर्धामा रहेका कृष्णबहादुर कार्की, चिरञ्जीवी चापागाईं र डा. नवराज अधिकारीलाई प्रस्तुतिकरण दिन आह्वान गरिएको छ। तर, विगतमा राजनीतिक प्रभाव र बिचौलियाको चलखेलका कारण प्रक्रिया अन्यौलमा परेकाले यसपटक पनि निष्पक्षता सुनिश्चित हुनेमा आशंका कायमै छ।

पुँजी बजारको अवस्था

अध्यक्षविहीनताको कारण प्राथमिक बजार लगभग ठप्प रहेको छ भने दोस्रो बजार पनि शिथिल छ। बोर्डमा नयाँ आईपीओ, राइट शेयर र एफपीओ जस्ता फाइलहरु लामो समयदेखि थन्किएका छन्। पुँजी बजारको सुधारका लागि सक्षम नेतृत्व आवश्यक भएपनि बिचौलियाहरुको हस्तक्षेपले प्रक्रिया जटिल बनाउँदै आएको छ।

अध्यक्ष चयन र दोस्रो स्टक एक्सचेन्जको विवाद

यसपटकको अध्यक्ष चयन प्रक्रियामा दोस्रो स्टक एक्सचेन्जको लाइसेन्स सम्बन्धी विवाद पनि प्रमुख मुद्दा बनेको छ। तीन कम्पनीले लाइसेन्सका लागि निवेदन दिएका छन्, जसमा शक्तिशाली व्यावसायिक समूहहरूको संलग्नता देखिएको छ। यसले गर्दा योग्य नेतृत्व चयनभन्दा व्यक्तिगत स्वार्थ अगाडि आएको टिप्पणी भइरहेको छ।

आइतवारको अन्तरवार्ता पुँजी बजारको भविष्यलाई निर्धारित गर्ने महत्त्वपूर्ण क्षण हुने छ। तर, यो प्रक्रिया निष्पक्ष हुने या फेरि कुनै नयाँ विवादमा फस्ने भन्ने समयले बताउनेछ। नेपालका लाखौं लगानीकर्ताको ध्यान अहिले यो प्रक्रियाको निष्कर्षतर्फ केन्द्रित छ।