कलश स्टक मार्केटद्वारा निःशुल्क शेयर शिक्षा कार्यक्रम सम्पन्न

काठमाडौँ — बुद्धनगर–१० मा मुख्य कार्यालय रहेको Kalash Stock Market Pvt. Ltd. (ब्रोकर नं ७४) ले शेयर बजारमा आवद्ध लगानीकर्ताहरूलाई लक्षित गर्दै निःशुल्क शेयर शिक्षा कार्यक्रम सम्पन्न गरेको छ।

२०८२ साल फागुन ६ गते, बुधबार काठमाडौँको गोङ्गबुस्थित बी.जी. ब्याङ्केट एण्ड इभेन्ट सेन्टरमा आयोजित कार्यक्रममा लगानी रणनीति, आधारभूत तथा प्राविधिक विश्लेषणसम्बन्धी प्रशिक्षण प्रदान गरिएको थियो। कार्यक्रममा उल्लेख्य संख्यामा लगानीकर्ताहरूको सहभागिता रहेको थियो।

कार्यक्रमका स्रोत व्यक्ति पूँजी बजार विश्लेषक सञ्जोग कोइरालाले शेयर बजारका विविध पक्ष, जोखिम व्यवस्थापन, दीर्घकालीन लगानी तथा बजार प्रवृत्तिबारे सहभागीहरूलाई जानकारी गराउनुभएको थियो। उहाँले सुरक्षित र सचेत लगानीका लागि ज्ञान र अनुशासन आवश्यक रहेकोमा जोड दिनुभयो।

कार्यक्रम सञ्चालन गर्दै कम्पनीका प्रतिनिधि रविन महतले कम्पनीले समय–समयमा देशका विभिन्न स्थान तथा अनलाइन माध्यमबाट वित्तीय साक्षरता तथा शेयर शिक्षा कार्यक्रम सञ्चालन गर्दै आएको जानकारी दिनुभयो। यस्ता कार्यक्रमले लगानीकर्ताको क्षमता अभिवृद्धिमा महत्वपूर्ण भूमिका खेल्ने उहाँको भनाइ थियो।

यसैगरी, कम्पनीका अध्यक्ष प्रदिप के.सी.ले आगामी दिनमा यस्ता सचेतनामूलक कार्यक्रमलाई अझ विस्तार गर्दै देशव्यापी रूपमा सञ्चालन गर्ने लक्ष्य रहेको बताउनुभयो।

कलश स्टक मार्केटले काठमाडौँको बुद्धनगरस्थित मुख्य कार्यालय तथा बुटवलको मिलनचोक शाखामार्फत डिम्याट र टीएमएस खाता खोल्ने तथा सेयर कारोबार सेवा प्रदान गर्दै आइरहेको छ। साथै, हरेक शुक्रबार साँझ ७ बजे जुममार्फत साप्ताहिक शेयर बजार विश्लेषण तथा लाइभ प्रश्नोत्तर कार्यक्रम सञ्चालन गर्दै आएको छ।

यस्ता कार्यक्रममार्फत कम्पनीले लगानीकर्तालाई सचेत, सक्षम र जिम्मेवार बनाउँदै पूँजी बजारमा स्वस्थ सहभागिता बढाउने लक्ष्य लिएको जनाएको छ।