कामना सेवा विकास बैंकको पहिलो त्रैमासिकमा १९ करोड ७६ लाख नाफा

कामना सेवा विकास बैंक लिमिटेडले चालु आर्थिक वर्ष २०८२/८३ को पहिलो त्रैमासिक अवधिसम्म १९ करोड ७६ लाख रुपैयाँ खुद नाफा आर्जन गरेको छ। बैंकले शुक्रबार सार्वजनिक गरेको अपरिष्कृत वित्तीय विवरणअनुसार, यस अवधिमा बैंकले वित्तीय सूचकहरू सन्तुलित रूपमा विस्तार गर्न सफल भएको देखिन्छ।

बैंकले समीक्षाधीन अवधिसम्म कुल ६३ अर्ब ७८ करोड रुपैयाँ निक्षेप संकलन गरेको छ भने ५३ अर्ब ४५ करोड रुपैयाँ कर्जा प्रवाह गरेको छ। यस आधारमा बैंकको कर्जा–निक्षेप अनुपात (CD Ratio) ८६.३५ प्रतिशत रहेको छ, जुन नेपाल राष्ट्र बैंकको तोकिएको दायराभित्र पर्दछ।

प्रथम त्रैमासको अन्त्यसम्म बैंकको कुल सम्पत्ति ७१ अर्ब ६३ करोड रुपैयाँ पुगेको छ। यस अवधिमा बैंकको निष्क्रिय कर्जा (NPL) अनुपात ४.४१ प्रतिशतमा सीमित रहेको छ, जसले बैंकको जोखिम व्यवस्थापनमा सुधार भएको संकेत गर्छ।

यसअघि सम्पन्न बैंकको १९औं वार्षिक साधारण सभाले आर्थिक वर्ष २०८१/८२ को संचित मुनाफाबाट शेयरधनीहरूलाई कुल १५.७८९५ प्रतिशत लाभांश वितरण गर्ने प्रस्ताव पारित गरेको थियो। उक्त लाभांशमा १५ प्रतिशत बोनस शेयर र ०.७८९५ प्रतिशत नगद लाभांश (कर प्रयोजनका लागि) समावेश गरिएको छ।