कात्तिकमा बैंकिङ कर्जा प्रवाह घट्यो, चालु आवमा चार महिनामा ११२ अर्बले बढ्यो

चालु आर्थिक वर्षका चार महिनामा बैंकहरूले १ खर्ब १२ अर्ब रुपैयाँ कर्जा प्रवाह गरेका छन्। अन्य महिनाको तुलनामा कात्तिकमा भने कर्जा प्रवाह १ अर्बले घटेको बैंकहरूले जनाएका छन्।

असोज मसान्तसम्म वाणिज्य बैंकहरूले ४६ खर्ब ८२ अर्ब रुपैयाँ कर्जा प्रवाह गरेका थिए, जसमा कात्तिकमा १ अर्बले घटेर ४६ खर्ब ८१ अर्बमा झरेको छ। यसअघि, गत असार मसान्तसम्ममा बैंकहरूले ४५ खर्ब ६९ अर्ब रुपैयाँ कर्जा प्रवाह गरेका थिए।

गत साउनमा २ अर्बले कर्जा प्रवाह बढेको थियो भने भदौमा ५४ अर्ब र असोजमा ५६ अर्बले वृद्धि भएको थियो। कात्तिकसम्ममा चार महिनामा कुल कर्जा प्रवाह ४६ खर्ब ८१ अर्ब पुगेको छ।

राष्ट्र बैंकको तथ्यांकअनुसार, चालु आवको असोज मसान्तसम्ममा निजी क्षेत्रमा बैंक तथा वित्तीय संस्थाबाट प्रवाहित कर्जा १ खर्ब २८ अर्ब ६५ करोड रुपैयाँ (२.५ प्रतिशत) ले बढेको छ। अघिल्लो वर्ष सोही अवधिमा कर्जा १ खर्ब ९ अर्ब ३ करोड (२.३ प्रतिशत) ले वृद्धि भएको थियो।

यसै अवधिमा बैंक तथा वित्तीय संस्थाहरूको निक्षेप १ खर्ब ७० अर्ब रुपैयाँ (२.६ प्रतिशत) ले वृद्धि भएको छ। अघिल्लो वर्ष यो वृद्धि १ खर्ब ५८ अर्ब ५० करोड रुपैयाँ (२.८ प्रतिशत) रहेको थियो।

हाल बैंकिङ प्रणालीमा झन्डै ७ खर्ब रुपैयाँ तरलता छ, जसलाई उपयोग गरी सरकारलाई रोजगारी सिर्जना र विकासका काम गर्न अवसर भए पनि त्यसको उचित उपयोग हुन सकेको छैन।