कर्जा घट्यो, निक्षेप बढ्यो, बैंकमा पैसा थुप्रियो

गत वैशाखमा वाणिज्य बैंकहरूको निक्षेपमा वृद्धि भए पनि कर्जा लगानीमा भने संकुचन देखिएको छ। नेपाल बैंकर्स संघले उपलब्ध गराएको तथ्यांक अनुसार चालु आर्थिक वर्ष २०८०/८१ वैशाखमा वाणिज्य बैंकहरूको कुल निक्षेप २६ अर्ब १९ करोडले बढेको छ, तर सोही अवधिमा कर्जा भने १५ अर्ब १९ करोडले घटेको छ।

चैत मसान्तमा ४५ खर्ब ३६ अर्ब ८४ करोड रहेको वाणिज्य बैंकहरूको कुल कर्जा वैशाखमा घटेर ४५ खर्ब २१ अर्ब ६४ करोडमा झरेको छ। निक्षेप भने चैत मसान्तमा ५४ खर्ब ४१ अर्ब ९१ करोड रहेकोमा वैशाख मसान्तमा ५४ खर्ब ६८ अर्ब ११ करोड पुगेको छ।

निक्षेप बढाउनेमा राष्ट्रिय वाणिज्य बैंक र नबिल बैंक अगाडि देखिएका छन्। चालु आव १० महिनामा ३ खर्ब ८२ अर्बले निक्षेप बढ्दा, राष्ट्रिय वाणिज्य बैंकको ६५ अर्ब ९ करोडले र नबिल बैंकको ५१ अर्ब ७१ करोडले वृद्धि भएको छ।

कर्जा विस्तारमा नबिल बैंक र प्राइम कमर्सियल बैंक आक्रामक देखिएका छन्। नबिल बैंकको कर्जा ४२ अर्ब २६ करोडले बढेर ३ खर्ब ८३ अर्ब ६९ करोड पुगेको छ भने प्राइम कमर्सियल बैंकको कर्जा २७ अर्ब ५० करोडले बढेर १ खर्ब ९० अर्ब ६१ करोड पुगेको छ।

कर्जा घटाएको स्ट्यान्डर्ड चार्टर्ड बैंकको निक्षेप पनि ८ अर्ब २५ करोडले घटेर १ खर्ब १४ अर्ब २४ करोडमा झरेको छ। यस्तै, प्रभु बैंकको निक्षेप १६ अर्ब ९ करोडले घटेर २ खर्ब ७९ अर्ब ८५ करोडमा र माछापुच्छ«े बैंकको निक्षेप ६ अर्ब ९ करोडले घटेर १ खर्ब ५२ अर्ब १९ करोडमा झरेको छ।