निक्षेप फिर्ता रोकेर कर्णाली विकास बैंकमा राष्ट्र बैंकले थाल्यो काम

नेपाल राष्ट्र बैंकले कर्णाली विकास बैंकलाई व्यवस्थापन नियन्त्रणमा लिई सुधारात्मक कार्य सुरु गरेको छ। राष्ट्र बैंकबाट खटिएका तीन प्रतिनिधिले बैंकको व्यवस्थापनमा हस्तक्षेप गरी आफ्नो कार्य थालनी गरेका छन्।

बैंकले सर्वसाधारणको निक्षेप भुक्तानीका लागि केही समय रोक लगाउँदै समस्या समाधानमा लाग्ने जानकारी दिएको छ। मंगलबार बैंकले सूचना जारी गर्दै निक्षेप फिर्ता लिनका लागि भुक्तानी लिन नआउन सर्वसाधारणलाई आग्रह गरेको छ।

राष्ट्र बैंकका प्रतिनिधिले बैंकको तरलता व्यवस्थापनका लागि विभिन्न विकल्पहरूमाथि काम गरिरहेका छन्। बैंकले सर्वसाधारणको निक्षेप भुक्तानीलाई पहिलो प्राथमिकतामा राखेर सुधार प्रक्रिया अगाडि बढाएको र आवश्यक रकमको व्यवस्थापन गरी पुनः भुक्तानी सुचारु गर्ने योजना बनाएको जानकारी दिएको छ।

सर्वसाधारणलाई तत्काल समस्या समाधानका लागि संयमित रहन आग्रह गर्दै बैंकले तरलता व्यवस्थापनमा कुनै कमी नआउने गरी काम गरिरहेको छ।