सन् २०२५ को अन्तिम कारोबार दिन नेप्से र कारोबार रकम दुवै बढे

सन् २०२५ को अन्तिम कारोबार दिन बुधबार नेप्से परिसूचक कारोबार रकमसहित बढेर बन्द भएको छ। सम्भावित निर्वाचनको चर्चा बढेसँगै बजारले सकारात्मक संकेत देखाएको हो। यस दिन नेप्से परिसूचक १०.५३ अंकले बढेर २६३३.७६ विन्दुमा पुगेको छ भने सेन्सेटिभ, फ्लोट र सेन्सेटिभ फ्लोट इण्डेक्स पनि क्रमशः बढेका छन्। बुधबार २६० कम्पनीका १ करोड १९ लाखभन्दा बढी कित्ता शेयर ५ अर्ब १३ करोड रुपैयाँभन्दा बढीमा कारोबार भएको छ, जुन अघिल्लो कारोबार दिनको तुलनामा वृद्धि हो। एसवाई प्यानल नेपाल र न्यादी हाइड्रोपावरको शेयर मूल्य सकारात्मक सर्किटमा पुगेको छ भने विन नेपाल लघुवित्तको शेयर मूल्य सर्वाधिक घटेको छ। कारोबार रकमका आधारमा ग्रिन भेन्चर्स शीर्ष स्थानमा रहँदा सबै १३ उपसमूहको परिसूचक बढेको छ, जसमा उत्पादन तथा प्रशोधन उपसमूह सबैभन्दा बढी बढेको देखिएको छ।