नेप्से परिसूचक पाँचै दिन उकालो, २६७८ विन्दु नजिक– साताभर ३२ अर्बभन्दा बढीको कारोबार

धितोपत्र बजारमा यो साता लगानीकर्ताको मनोबल उकालो लाग्दै नेप्से परिसूचक लगातार पाँचै दिन बढेको छ। आइतबारदेखि बिहीबारसम्म बजार लगातार हरियो रहेर समग्र सूचक ४० अंकभन्दा बढीले उक्लिएर २,६७६.०३ विन्दु मा पुगेको हो। साताभर कुल ६ करोड २९ लाख ९९ हजार ६०४ कित्ता सेयर ३२ अर्ब १७ करोड १३ लाख ३६ हजार १८९ रुपैयाँ बराबरमा किनबेच भयो। मङ्गलबार बाहेक हरेक दिन कारोबार रकम ६ अर्बभन्दा माथि रहनु बजार सक्रियताको प्रमुख संकेत मानिएको छ।

आइतबार : ३९.९२ अंकले उकालो

साताको पहिलो दिन आइतबार नेप्से ३९.९२ अंकले बढेर २,६००.२२ विन्दु मा पुगेको थियो। सो दिन १ करोड २३ लाख ७६ हजार ४७१ कित्ता सेयर ६ अर्ब १९ करोड १८ लाख ८० हजार ९९६ मा किनबेच भयो। सामूहिक लगानी समूहबाहेक अधिकांश उपसूचक हरियो रहे।
सागर डिस्टिलरी, बन्दीपुर केबलकार र झापा इनर्जीमा सकारात्मक सर्किट लाग्दा पिपुल्स हाइड्रोपावर ७.५६% ले घटेर सर्वाधिक गुमाउने कम्पनी बन्यो।

सोमबार : ५०.४४ अंकको बलियो उछाल

सोमबार परिसूचक थप ५०.४४ अंक उक्लिएर २,६५०.६६ विन्दु मा पुग्यो।
यो दिन बजारमा १ करोड ३१ लाख ७८ हजार ६७६ कित्ता सेयर ६ अर्ब ९८ करोड ३ लाख ६६ हजार ७४३ मा कारोबार भयो।
नेपाल लाइफ इन्स्योरेन्स २४ करोड ८१ लाख कारोबारसहित शीर्ष स्थानमा रह्यो।
झापा इनर्जीले १०% ले उकालो लाग्दै लगातार दोस्रो दिन सर्किट हान्यो।
सागर डिस्टिलरी, बन्दीपुर केबलकार, स्वस्तिक लघुवित्त र श्रीनगर एग्रोटेकका लगानीकर्ताले ९% भन्दा बढी नाफा कमाए। मविलुङ इनर्जी ४.४४% ले घट्यो।

मङ्गलबार : ५.३२ अंकको सामान्य वृद्धि

साताको तेस्रो दिन मङ्गलबार नेप्से ५.३२ अंकले बढेर २,६५५.९९ विन्दु मा पुगेको थियो।
सो दिन १ करोड १३ लाख ९९ हजार ४१० कित्ता सेयर ५ अर्ब ७७ करोड २३ लाख ६७ हजार २९ मा कारोबार भयो।
विकास बैंक, जीवन बीमा, सामूहिक लगानी तथा व्यापार समूहका उपसूचक घटे भने अन्य सबै उपसूचक हरियो रहे। होटल तथा पर्यटन समूह १.४१% ले उकालो लाग्दै अग्रस्थानमा रह्यो।

यस दिन बन्दीपुर केबलकार २६ करोड ९९ लाख कारोबारसहित शीर्ष स्थानमा रह्यो। झापा इनर्जीले फेरि १०% ले वृद्धि भई सर्किट हान्दा सागर डिस्टिलरी र श्रीनगर एग्रोटेकमा समेत ९% भन्दा बढी नाफा भयो। जोशी हाइड्रोपावर ४.९६% ले घट्यो।

बुधबार : ९.६१ अंकको वृद्धि

बुधबार परिसूचक ९.६१ अंक बढेर २,६६५.६० विन्दु मा पुगेको थियो।
सो दिन १ करोड २३ लाख ३१ हजार ७९१ कित्ता सेयर ६ अर्ब ६३ करोड ३९ लाख ४८ हजार ९३६ मा कारोबार भयो।
बैंकिङ, लगानी, जीवन बीमा, सामूहिक लगानी तथा निर्जीवन बीमा समूहका उपसूचक भने घटे।
होटल तथा पर्यटन समूह ०.९९% ले बढ्दै अग्रस्थानमा रह्यो।

बुधबार एनआरएन इन्फ्रास्ट्रक्चर ६२ करोड ४३ लाख कारोबारसहित शीर्ष स्थानमा रह्यो। झापा इनर्जीले लगातार चौथो दिन १०% ले बढेर सर्किट हान्यो।
सागर डिस्टिलरी, स्वस्तिक लघुवित्त, श्रीनगर एग्रोटेक, रिभरफल्स पावर र माहुली लघुवित्त सबैले ९% भन्दा बढी नाफा कमाएका थिए।
बोटलर्स नेपाल (बालाजु) ३.९४% ले घट्दै सो दिनको सर्वाधिक घट्ने कम्पनी बन्यो।

बिहीबार : साताको अन्तिम दिन पनि हरियो

साताको अन्तिम दिन बिहीबार नेप्से १०.४३ अंक बढेर २,६७८.०३ विन्दु मा पुगेको छ।
सो दिन १ करोड ३७ लाख १३ हजार २५६ कित्ता सेयर ६ अर्ब ५९ करोड २७ लाख ७२ हजार ४८३ मा कारोबार भयो।

सागर डिस्टिलरी १०% ले उक्लँदै सकारात्मक सर्किट लाग्दा स्वस्तिक लघुवित्त, श्रीनगर एग्रोटेक, झापा इनर्जी र एनआरएन इन्फ्रास्ट्रक्चरमा ९% भन्दा बढी नाफा भयो। हिमस्टार इनर्जी सर्वाधिक घट्ने कम्पनी बन्यो।
यसदिन बैंकिङ समूहको उपसूचक १.४९% ले उकालो लाग्दै सबैभन्दा धेरै बढ्यो।

बजार मनोविज्ञान : अपेक्षा र अनिश्चितता दुवै बढ्दै

लगातार पाँच दिनको उकालोले बजारमा सकारात्मक ऊर्जा देखिए पनि लगानीकर्ता मनोविज्ञान ‘मिश्रित’ रहेको विश्लेषकहरूको भनाइ छ।
निकट भविष्यमा आउने मौद्रिक नीति समीक्षा नेप्सेको गति निर्धारण गर्ने मुख्य कारक हुनेछ।

हाल बैंकिङ क्षेत्रमा पर्याप्त तरलता छ र ब्याजदर पनि न्यून छ, तर कर्जा विस्तार भने अपेक्षित रूपमा बढ्न सकेको छैन।
यति हुँदा लगानीकर्ताले बजारको यथार्थ बुझ्दै सतर्कतापूर्वक कारोबार गरिरहेको देखिन्छ।

विश्लेषकको निष्कर्ष : नियामक स्पष्टता र आर्थिक वातावरणले नेप्सेको दिशा तय गर्ने

विश्लेषकहरूका अनुसार आगामी दिनमा—

• मौद्रिक नीति

• कर्जा विस्तारमा सुधार

• राजनीतिक वातावरण

• आगामी निर्वाचनको स्थिरता

• पूँजीबजारमैत्री प्रावधान

जस्ता कारकहरूले बजारमा मनोवैज्ञानिक उत्साह थप्न सक्छन्।
यदि यी पक्ष सकारात्मक देखिए, नेप्सेले पछिल्लो उकालोलाई अझै बलियो बनाउँदै नयाँ उचाइ छुन सक्ने उनीहरूको अनुमान छ।