एनआईसी एसिया बैंकका अध्यक्ष तुलसीराम अग्रवालले दिए राजीनामा

एनआईसी एसिया बैंक का अध्यक्ष तुलसीराम अग्रवालले पदबाट राजीनामा दिएका छन्। उनले व्यक्तिगत कारण देखाउँदै पुस ६ गते बैंकमा राजीनामा बुझाएका हुन्। सोही दिन बसेको बैंकको सञ्चालक समितिको बैठकले उनको राजीनामा औपचारिक रूपमा स्वीकृत गरेको छ।

अग्रवाल २०७८ चैत महिनामा सम्पन्न बैंकको २४औँ वार्षिक साधारणसभाबाट अध्यक्ष पदमा नियुक्त भएका थिए। अध्यक्षको जिम्मेवारी सम्हाल्दै आएका अग्रवालले नियामक कारबाहीपछि पद त्याग्ने निर्णय गरेका हुन्।

यसअघि नेपाल राष्ट्र बैंक ले बैंकका तत्कालीन प्रमुख कार्यकारी अधिकृत (सीईओ) रोशन न्यौपाने र अध्यक्ष अग्रवाललाई नियम उल्लङ्घनको आरोपमा जनही २–२ लाख रुपैयाँ जरिवाना तिराउने निर्णय गरेको थियो। उक्त कारबाहीसम्बन्धी पत्र पुस ४ गते बैंकका प्रतिनिधिले बुझेका थिए।

राष्ट्र बैंकको कारबाहीपछि बैंकभित्र नेतृत्व तहमा तनाव बढेको बताइन्छ। जरिवानासम्बन्धी पत्र प्राप्त गरेपछि अग्रवालले अध्यक्ष पदबाट राजीनामा दिने निर्णय गरेको स्रोतको भनाइ छ। सञ्चालक समितिले उनको निर्णयलाई स्वीकार गर्दै राजीनामा स्वीकृत गरेको हो।

यस घटनाले बैंकको नेतृत्व संरचना र नियामक निकायसँगको सम्बन्धलाई पनि थप चर्चामा ल्याएको छ। बैंक स्रोतका अनुसार अब नयाँ अध्यक्ष नियुक्तिका लागि आवश्यक प्रक्रिया अघि बढाउने तयारी सुरु भइसकेको छ।