वाणिज्य बैंकलाई काउन्टर साइक्लिकल बफर कार्यान्वयनमा समय थप

नेपाल राष्ट्र बैंकले बैंक तथा वित्तीय संस्थाहरुलाई लागु हुने काउन्टर साइक्लिकल बफर (Counter Cyclical Buffer) कार्यान्वयन गर्ने समय थप गरेको छ। यस प्रावधान अनुसार वाणिज्य बैंकहरुले चालु आर्थिक वर्षमा थप पुँजी राख्नु नपर्ने भएको छ।

राष्ट्र बैंकले बैंक तथा वित्तीय संस्थाहरुलाई जारी गरेको एकीकृत निर्देशन, २०८१ मा संशोधन गर्दै चालु आर्थिक वर्षका लागि काउन्टरसाइक्लिकल बफरलाई शून्य प्रतिशत कायम गरेको हो। यसअघि आ.व. २०८०/८१ देखि वाणिज्य बैंकहरुले क्यापिटल एडूक्वेसी फ्रेमवर्क, २०१५ बमोजिम यस्तो बफर कायम गर्नुपर्ने व्यवस्था गरिएको थियो।

यस व्यवस्थाले अब बैंकहरुको क्यापिटल एडुकेसी रेसियो (CAR) ११ प्रतिशत र टियर–वन क्यापिटल (CCAR) ८.५ प्रतिशत भए पुग्नेछ। राष्ट्र बैंकको अनुसार, यसले बैंकहरुलाई थप कर्जा प्रवाह गर्ने क्षमता विस्तार गर्न सहयोग पुर्‍याउनेछ।

क्यापिटल एडुकेसी फ्रेमवर्क, २०१५ अनुसार वाणिज्य बैंकहरुले कुल जोखिम भारित सम्पत्ति (Risk Weighted Assets) अर्थात् कर्जाको ०.५ प्रतिशत काउन्टर साइक्लिकल बफरका रुपमा कायम गर्नुपर्ने व्यवस्था थियो। यो बफर अघिल्लो आर्थिक वर्षदेखि लागूमा ल्याइएको हो।

काउन्टर साइक्लिकल बफर भन्नाले कुल गार्हस्थ उत्पादन (GDP) को विस्तारभन्दा कर्जाको विस्तार बढी हुँदा सिर्जित जोखिमलाई न्यूनीकरण गर्न बैंकहरुले अतिरिक्त प्राथमिक पुँजी राख्ने व्यवस्थालाई जनाउँछ। राष्ट्र बैंकले चालु आर्थिक वर्षसम्मका लागि यो अनुपातलाई शून्य बनाइदिएसँगै तत्कालका लागि बैंकहरुको पूँजी भार हल्का भएको छ।