श्रोत व्यवस्थापन चुनौतीपूर्ण बन्दै : उपप्रधानमन्त्री पौडेल

उपप्रधानमन्त्री एवम् अर्थमन्त्री विष्णुप्रसाद पौडेलले देशको विकासमा श्रोत व्यवस्थापन चुनौतीपूर्ण बन्दै गएको बताएका छन्। मंगलबार नेपाल चार्टर्ड एकाउण्टेन्ट्स संस्थाको कार्यक्रममा बोल्दै उनले यस्तो धारणा राखे।

उनले देश-विदेशका निजी क्षेत्रलाई नेपालमा लगानी गर्न, उत्पादन बढाउन, रोजगारी सिर्जना गर्न, मुनाफा कमाउन, कर तिर्न र सम्मानित करदाता बन्न आह्वान गरे। सरकारले लगानीकर्तालाई आकर्षित गर्न अध्यादेशमार्फत वातावरण बनाएको उनको भनाइ छ। “ती अध्यादेश अहिले कानून बनेका छन्। नियमावली, निर्देशिका र मापदण्ड पनि तयार भइसकेका छन्, जुन मन्त्रीपरिषद्ले छिट्टै पारित गर्नेछ,” उनले भने।

पौडेलले नेपालमा लगानीमैत्री वातावरण निर्माणमा सरकार प्रतिबद्ध रहेको र लगानीका प्रशस्त सम्भावना भएको उल्लेख गरे। “श्रोत व्यवस्थापन चुनौतीपूर्ण छ, तर हामी लगानीकर्तालाई आकर्षित गर्न प्रयासरत छौं,” उनले थपे।