सगर डिष्टिलरीको आईपीओ बाँडफाँट सम्पन्न, भाग्यमानी १ लाख १९ हजार ६४ जनाले पाए १०/१० कित्ता

सगर डिष्टिलरी लिमिटेडको आईपीओ बाँडफाँट आज इश्यू म्यानेजर मुक्तिनाथ क्यापिटल लिमिटेड, नक्साल, काठमाडौंमा सम्पन्न भएको छ।

कम्पनीले भदौ ३० देखि असोज ५ गतेसम्म सर्वसाधारणका लागि ११ लाख ९० हजार ६४० कित्ता शेयर सार्वजनिक निष्काशन गरेको थियो। कम्पनीको चुक्ता पुँजी ७२ करोड ६० लाख रुपैयाँ रहेको छ, जसको २० प्रतिशत अर्थात १४ लाख ५२ हजार कित्ता (१४ करोड ५२ लाख रुपैयाँ बराबर) सर्वसाधारणका लागि निष्काशन गरिएको हो।

यस मध्ये १० प्रतिशत अर्थात १ लाख ४५ हजार २०० कित्ता विदेशमा रहेका नेपालीका लागि, ३ प्रतिशत अर्थात ४३ हजार ५६० कित्ता कम्पनीका कर्मचारीका लागि, र ५ प्रतिशत अर्थात ७२ हजार ६०० कित्ता म्युचुअल फन्डका लागि छुट्याइएको थियो। बाँकी ११ लाख ९० हजार ६४० कित्ता शेयर सर्वसाधारणका लागि निष्काशन गरिएको थियो।

यस आईपीओमा २१ लाख ९३ हजार ८२३ मान्य आवेदनमार्फत २ करोड ३८ लाख ८२ हजार २१० कित्ता शेयर माग परेको थियो। त्यसमध्ये ३२ हजार ११ वटा आवेदन (३ लाख ७९ हजार २२० कित्ता) अस्वीकृत भएका थिए।

बाँडफाँट अनुसार १ लाख १९ हजार ६४ भाग्यमानी आवेदकलाई लटरीमार्फत १०/१० कित्ता शेयर मात्र पर्न पुगेको छ।

यसको नतिजा सीडिएससी आईपीओ रिजल्ट, मेरो शेयर र मुक्तिनाथ क्यापिटल लिमिटेडमार्फत हेर्न सकिन्छ।

सगर डिष्टिलरीलाई इन्फोमेरिक्स क्रेडिट रेटिङ नेपाल लिमिटेडले IRN B+ (Is) [सिंगल बी प्लस (इशुअर)] रेटिङ प्रदान गरेको छ। यो रेटिङले कम्पनीलाई समयमा वित्तीय दायित्व पूरा गर्ने उच्च जोखिमयुक्त रहेको जनाउँछ।

सगर डिष्टिलरी लिमिटेड (SDL) सन् २०१४ मा स्थापना भई २०२३ मे २१ मा सार्वजनिक लिमिटेड कम्पनीमा रूपान्तरण भएको हो। कम्पनीले भोड्का, ह्विस्की, जिनलगायतका उच्च गुणस्तरका मदिरा उत्पादन तथा प्याकेजिङ गर्दै आएको छ। वार्षिक उत्पादन क्षमता ५० लाख लिटर रहेको यस कम्पनीका प्रमुख उत्पादनहरूमा ललिपप (विभिन्न फ्लेवर), रोयल ब्लु, ग्रे वुल्फ, बेरीज एण्ड ब्लुज र नेप्से बुल्स रहेका छन्।

कम्पनीका मुख्य प्रवर्तकहरूमा सन्दीप Jalan (१७.४८%), आशुतोष खेतान (१९.०८%) र अल्का गोयल (१५.१०%) रहेका छन्।