नेपाली शेयर बजारमा गिरावटको सिलसिला जारी रहँदै लगातार तेस्रो कारोबार दिन पनि नेप्से परिसूचक घटेर बन्द भएको छ। पछिल्ला तीन दिनको कारोबारमा सूचक झण्डै ५८ अंकले घट्दा बजारमा निरन्तर बिक्री दबाब रहेको स्पष्ट संकेत देखिएको छ । लगानीकर्ताको मनोबल कमजोर बन्दै जाँदा बजारले पुनः गति लिन नसकेको अवस्था झल्किएको छ । बिहीबार नेप्से परिसूचक ५.७३ अंकले घटेर २,७३८.७२ विन्दुमा झरेको छ। यसअघि मंगलबार २६.१६ अंक र बुधबार २५.८१ अंकले घटेको थियो। साताको अन्तिम कारोबार दिनसमेत घटेर बन्द हुँदा बजारले लगातार ओरालो यात्रालाई कायम राखेको देखिन्छ। शुक्रबार सार्वजनिक विदा परेकाले अब नियमित कारोबार सोमबार मात्र खुल्नेछ, जसले लगानीकर्तामा थप प्रतीक्षाको अवस्था सिर्जना गरेको छ । यस दिन अन्य सूचकहरूमा पनि सामान्य गिरावट देखिएको छ । सेन्सेटिभ इण्डेक्स ०.०७ अंकले घट्दा फ्लोट इण्डेक्स ०.२९ अंक र सेन्सेटिभ फ्लोट इण्डेक्स ०.०१ अंकले घटेका छन्। सूचकहरूमा आएको यो हल्का गिरावटले बजारमा व्यापक उतारचढाव नभए पनि समग्र प्रवृत्ति नकारात्मक रहेको संकेत गरेको छ । कारोबार रकम पनि अघिल्लो दिनको तुलनामा केही घटेको छ । बुधबार ४ अर्ब ९८ करोड रुपैयाँको कारोबार भएकोमा बिहीबार ३४६ कम्पनीका ८० हजारभन्दा बढी कारोबारमार्फत करिब ४ अर्ब ९१ करोड ६६ लाख रुपैयाँ बराबरको शेयर किनबेच भएको छ। यसले बजारमा सक्रियता केही घटेको देखाउँछ ।बजारमा मिश्रित अवस्था देखिए पनि गिरावटतर्फ झुकाव बढी देखिएको छ । कुल ९८ कम्पनीको शेयर मूल्य बढ्दा १६१ कम्पनीको घटेको छ भने १० कम्पनीको मूल्य स्थिर रहेको छ । यसले अधिकांश कम्पनीमा बिक्री दबाब हाबी रहेको स्पष्ट पार्छ । उपसमूहगत रूपमा हेर्दा १३ मध्ये ११ उपसमूह घटेका छन्। बैंकिङ र उत्पादन तथा प्रशोधन उपसमूह मात्र सामान्य रूपमा बढ्न सफल भएका छन् भने अन्य सबै उपसमूहमा गिरावट देखिएको छ। यद्यपि अधिकांश उपसमूहको गिरावट दर १ प्रतिशतभन्दा कम रहेकाले बजारमा तीव्र गिरावट भने देखिएको छैन । व्यक्तिगत कम्पनीतर्फ श्रीनगर एग्रिटेक इन्डस्ट्रिजको शेयर मूल्य सर्वाधिक १२.५७ प्रतिशतले बढेको छ भने कर्पोरेट डेभलपमेन्ट बैंकको मूल्य १०.३८ प्रतिशतले घटेको छ । कारोबार रकमका आधारमा रिलायन्स स्पिनिङ्ग मिल्स शीर्ष स्थानमा रहँदा आँखु खोला जलविद्युत र नेशनल हाइड्रोपावर कम्पनी पनि सक्रिय कारोबार भएका कम्पनीमा परेका छन् । समग्रमा, बजारले छोटो अवधिमा निरन्तर दबाब झेलेको देखिए पनि ठूलो गिरावट नआएको अवस्थाले लगानीकर्ता अझै ‘पर्ख र हेर’ को मनस्थितिमा रहेको संकेत गर्दछ । आगामी कारोबार दिनमा बजारको दिशा निर्धारणमा लगानीकर्ताको विश्वास र नयाँ सकारात्मक सूचनाको भूमिका महत्वपूर्ण हुने देखिन्छ ।
अब लागौ प्राविधिक विश्लेषण तर्फ
नेपाली शेयर बजारले प्राविधिक रूपमा महत्वपूर्ण सपोर्ट जोनलाई पुनः एकपटक सम्मान गरेको संकेत देखिएको छ । बिहीबारको कारोबारमा नेप्से परिसूचक २०० दिने मूभिङ एभरेज र ट्रेन्डलाइन सपोर्ट नजिकै पुगेपछि त्यहीँबाट रियाक्सन दिँदै डोजी क्यान्डल बनाएर बन्द भएको छ । यसले बजार हाल निर्णायक मोडमा रहेको र अबको चाल महत्वपूर्ण हुने संकेत गरेको छ । चार्ट विश्लेषणअनुसार २०० दिने मूभिङ एभरेज आसपास बजारले विगतमा पटक–पटक प्रतिक्रिया दिएको इतिहास रहेको छ । अहिले पनि सोही स्तरमा बजार टिकेर प्रतिक्रिया दिएको देखिएकाले प्राविधिक रूपमा यो क्षेत्र बलियो सपोर्टको रूपमा पुष्टि भएको छ । आरएसआई करिब ४० को आसपास आइपुगेको छ, जुन सामान्यतया ‘रियाक्सन जोन’ मान्न सकिने प्राविधिक विश्लेषक अजीत खनाल बताउनछन् । यसले बजार अत्यधिक ओभरसोल्ड नभए पनि कमजोर अवस्थाबाट फर्किने सम्भावना संकेत गरेको छ । यसबीच ए डि एक्स सूचक माथि लाग्न थालेको देखिएको छ, जसले बजारमा ट्रेन्डको शक्ति बढ्न सक्ने संकेत गर्छ । यद्यपि, यो शक्ति कुन दिशामा जान्छ भन्ने अझै स्पष्ट छैन । यदि आगामी दिनमा बजारले ‘लोअर लो’ बनाउँदै ए डि एक्स अझै माथि बढ्यो भने गिरावट थप बलियो बन्न सक्ने जोखिम रहन्छ । तर सकारात्मक परिदृश्यमा बजारले यही सपोर्टबाट उकालो लिँदै ‘हायर हाई’ क्यान्डल बनायो भने पुनः बुलिश गति देखिन सक्छ । दिनभरको कारोबार हेर्दा बजारले सामान्य ग्यापडाउन ओपन गरेको थियो र बिहान ११ः२१ बजे डे–लो बनाएको देखिन्छ । त्यसपछि मध्यान्हतिर विशेषगरी बैंकिङ र जलविद्युत समूहमा देखिएको खरिद चापले सूचकलाई माथि तानेको थियो । बजारले करिब १ः१७ बजे डे–हाई बनाएको भए पनि त्यसपछि पुनः बिक्री दबाब बढ्दै अन्त्यमा सुधार कायम राख्न सकेन । विशेषगरी शीर्ष १० ब्रोकरको गतिविधि हेर्दा ७ ब्रोकरले खरिदभन्दा बढी बिक्री गरेको देखिन्छ । पछिल्ला केही दिनदेखि ठूला ब्रोकरहरू बिक्रीतर्फ झुकेको प्रवृत्तिले बजारमा दबाब कायम रहेको पुष्टि गर्छ । समग्रमा, बजारले महत्वपूर्ण सपोर्ट जोन परीक्षण गरिसकेको अवस्थामा अबको प्रमुख प्रतीक्षा ‘हायर हाई’ क्यान्डलको रहेको छ। यही स्तरबाट मजबुत उकालो लागेमा बजारले पुनः आत्मविश्वास पाउने सम्भावना रहन्छ, अन्यथा गिरावटको जोखिम अझै कायम रहने देखिन्छ ।
