विजय लघुवित्त वित्तीय संस्था लिमिटेडको एफपीओ पुस २१ देखि खुला

विजय लघुवित्त वित्तीय संस्था लिमिटेडले पुस २१ गतेदेखि थप सार्वजनिक निष्कासन (एफपीओ) मार्फत साधारण शेयर बिक्रीमा ल्याउने भएको छ। संस्थापक र सर्वसाधारण शेयरधनीबीच ७०ः३० को स्वामित्व अनुपात कायम गर्न लघुवित्तले एफपीओ निष्कासन गर्न लागेको हो।

सारथि लघुवित्त वित्तीय संस्था र विजय लघुवित्तबीच मर्जर सम्पन्न भएपछि लघुवित्तको चुक्ता पुँजी ७४ करोड ५० लाख ४० हजार ३५९ रुपैयाँ पुगेको छ। मर्जरपश्चात संस्थापक र सर्वसाधारण समूहको शेयर स्वामित्व अनुपात ७४.३९ः२५.६१ प्रतिशत कायम भएकाले सो असन्तुलन समायोजन गर्न थप साधारण शेयर सार्वजनिक गर्न लागिएको लघुवित्तले जनाएको छ।

एफपीओअन्तर्गत लघुवित्तले प्रतिशेयर १०० रुपैयाँ अंकित दरमा कुल ४ लाख ६६ हजार ८१७ कित्ता साधारण शेयर निष्कासन गर्नेछ। यसबाट संस्थाले ४ करोड ६६ लाख ८१ हजार ७०० रुपैयाँ पूँजी संकलन गर्ने लक्ष्य राखेको छ।

शेयर निष्कासन छिटोमा पुस २४ गते र ढिलोमा माघ ५ गतेसम्म खुला रहनेछ। इच्छुक सर्वसाधारण लगानीकर्ताले न्यूनतम १० कित्ता र अधिकतम १ हजार कित्तासम्म आवेदन दिन सक्नेछन्।