विजय लघुवित्त वित्तीय संस्था लिमिटेड (VLBS) ले पुस २१ गतेदेखि थप सार्वजनिक निष्काशन (FPO) जारी गर्ने भएको छ। संस्थापक र सर्वसाधारण शेयरधनीबीच ७०ः३० को शेयर स्वामित्व अनुपात कायम गर्न लघुवित्तले एफपीओ निष्काशन गर्न लागेको हो। साविकको नयाँ सारथी लघुवित्त र विजय लघुवित्तको मर्जरपछि लघुवित्तको चुक्ता पूँजी ७४ करोड ५० लाख ४० हजार ३५९ रुपैयाँ पुगेको छ भने मर्जरपश्चात संस्थापक र सर्वसाधारण समूहको शेयर स्वामित्व ७४.३९ प्रतिशत र २५.६१ प्रतिशत रहेको थियो। सो अनुपात समायोजन गर्न लघुवित्तले प्रतिशेयर १०० रुपैयाँ अंकित दरमा ४ लाख ६६ हजार ८१७ कित्ता साधारण शेयर एफपीओमार्फत निष्काशन गर्न लागेको हो, जसको कुल रकम ४ करोड ६६ लाख ८१ हजार ७०० रुपैयाँ बराबर हुनेछ।
एफपीओ निष्काशन पुस २४ गते छिटोमा बन्द हुनेछ भने ढिलोमा माघ ५ गतेसम्म आवेदन दिन सकिनेछ। लगानीकर्ताले न्यूनतम १० कित्ता र अधिकतम १ हजार कित्तासम्म आवेदन दिन सक्नेछन्। इक्रा नेपालबाट गरिएको रेटिङमा लघुवित्तले ‘इक्राएनपी इस्यूअर रेटिङ बी एटदरेट’ प्राप्त गरेको छ, जसले वित्तीय दायित्व पूरा गर्ने क्षमतामा उच्च जोखिम रहेको संकेत गर्दछ। एफपीओ निष्काशन तथा बिक्री प्रबन्धक एनएमबि क्यापिटल लिमिटेड रहेको छ। लगानीकर्ताले आस्बा सेवामा सहभागी बैंक तथा वित्तीय संस्थामार्फत सि–आस्बा प्रणाली प्रयोग गरी आवेदन दिन सक्नेछन् भने सिडिएस एण्ड क्लियरिङ लिमिटेडद्वारा विकसित ‘मेरो शेयर’ अनलाइन प्रणालीमार्फत पनि आवेदन दिन सक्ने व्यवस्था गरिएको छ।
