काठमाडौं । नेपाल पूँजीबजार लगानीकर्ता संघले नेपाल धितोपत्र बोर्डका नवनियुक्त अध्यक्षलाई बधाई तथा सफल कार्यकालको शुभकामना दिएको छ। संघले बोर्डको नेतृत्वमा पुँजी बजार सुधार, नीतिगत स्थायित्व र लगानीकर्ताको विश्वास बढाउने काम प्रभावकारी रूपमा अघि बढ्ने अपेक्षा व्यक्त गरेको छ।
संघका अध्यक्ष एस.पी. चौलागाईंले हस्ताक्षर गरेको शुभकामना पत्रमा नेपालको पुँजी बजारलाई अझ पारदर्शी, प्रतिस्पर्धी, विश्वसनीय, प्रविधिमैत्री र अन्तर्राष्ट्रिय मापदण्डअनुरूप विकास गर्न सक्षम नेतृत्वको आवश्यकता रहेको उल्लेख गरिएको छ। संघले नवनियुक्त अध्यक्षको अनुभव र नेतृत्वले बजार सुधारको नयाँ युग सुरु गर्ने विश्वास व्यक्त गरेको छ।
पत्रमा पुँजी बजार केवल शेयर कारोबार गर्ने माध्यम मात्र नभई राष्ट्रिय बचतलाई उत्पादनशील क्षेत्रमा परिचालन गर्ने, उद्योग–व्यवसायका लागि दीर्घकालीन वित्तीय स्रोत सुनिश्चित गर्ने र आर्थिक विकासलाई गति दिने महत्वपूर्ण वित्तीय पूर्वाधार भएको उल्लेख छ। त्यसैले नियामक निकायका रूपमा नेपाल धितोपत्र बोर्डको भूमिका अझ प्रभावकारी, सक्रिय र दूरदर्शी हुनुपर्ने संघको भनाइ छ।
संघले लगानीकर्ताले धितोपत्र बोर्डलाई अभिभावक संस्थाका रूपमा अनुभूति गर्न सक्ने गरी पारदर्शी शासन, लगानीमैत्री वातावरण, नवीनतम प्रविधिको प्रयोग, नीतिगत स्पष्टता र सरल नियममार्फत बजारमा विश्वास तथा स्थायित्व जगाउनुपर्ने अपेक्षा राखेको छ।
त्यस्तै, पुँजी बजारको पहुँच देशका हरेक कुनाकाप्चासम्म पुर्याउने, लगानीकर्ताको हकहित संरक्षण गर्ने र राष्ट्रको आर्थिक समृद्धिमा पुँजी बजारको योगदान बढाउने दिशामा बोर्डको नयाँ नेतृत्व सफल हुने विश्वास संघले व्यक्त गरेको छ।
तस्बिरमा संघका प्रतिनिधिले धितोपत्र बोर्डका अध्यक्षलाई भेटेर पुष्पगुच्छासहित शुभकामना दिएको देखिन्छ।
