कालीमाटी फलफूल तथा तरकारी बजार विकास समितिले बुधबारका लागि कृषि उपजको न्यूनतम थोक मूल्यसूची सार्वजनिक गरेको छ। नयाँ मूल्यसूचीअनुसार बजारमा अधिकांश तरकारी तथा फलफूलको मूल्य अघिल्लो दिनको तुलनामा स्थिर रहे पनि केही वस्तु उच्च मूल्यमा कारोबार भइरहेका छन्।
समितिका अनुसार नेपाली र भारतीय ठूलो गोलभेँडा प्रतिकिलो ६० रुपैयाँमा कारोबार भइरहेको छ भने सानो लोकल गोलभेँडा १५ रुपैयाँ र तराईको सानो गोलभेँडा २० रुपैयाँ प्रतिकिलो कायम गरिएको छ। लाम्चो रातो आलु ३५ रुपैयाँ, भारतीय आलु २८ रुपैयाँ र भारतीय प्याज ४२ रुपैयाँ प्रतिकिलोमा बिक्री भइरहेको छ।
हरियो तरकारीतर्फ लोकल गाँजर ८० रुपैयाँ, बन्दा ५० रुपैयाँ, काउली ४० रुपैयाँ तथा भिण्डी २५ रुपैयाँ प्रतिकिलो निर्धारण गरिएको छ। मटरकोसा प्रतिकिलो १५० रुपैयाँमा कारोबार भइरहँदा घिउ सिमी ३० रुपैयाँ र राजमा सिमी ७० रुपैयाँ प्रतिकिलोमा उपलब्ध रहेको समितिले जनाएको छ।
फलफूलतर्फ झोले स्याउ प्रतिकिलो २०० रुपैयाँ, फुजी स्याउ २०८ रुपैयाँ, कागती १८० रुपैयाँ र अनार ४०० रुपैयाँमा बिक्री भइरहेको छ। नेपाली मेवा ८० रुपैयाँ र भारतीय मेवा ९० रुपैयाँ प्रतिकिलो कायम गरिएको छ भने नेपाली केरा प्रतिदर्जन १८० रुपैयाँ र मालभोग केरा प्रतिदर्जन २०० रुपैयाँमा कारोबार भइरहेको छ।
च्याउमध्ये सिताके च्याउ सबैभन्दा महँगो देखिएको छ, जसको न्यूनतम थोक मूल्य प्रतिकिलो ८०० रुपैयाँ तोकिएको छ। त्यसपछि डल्ले च्याउ ३२० रुपैयाँ, राजा च्याउ २८० रुपैयाँ र कन्य च्याउ २०० रुपैयाँ प्रतिकिलोमा उपलब्ध रहेको समितिले जनाएको छ।
