काठमाडौं — मौद्रिक नीतिबाट बजार सुधारको अपेक्षा गरेका शेयर लगानीकर्ताको आशा तत्काल पूरा हुन सकेन। नेपाल राष्ट्र बैंकले ल्याएको मौद्रिक नीतिपछि पनि लगानीकर्ताको मनोबल कमजोर हुँदा शेयर बजार फेरि ओरालो लागेको छ।
बजेट घोषणापछि सुरु भएको बजार गिरावट मौद्रिक नीति सार्वजनिक भएपछि थप दबाबमा परेको देखिएको छ। पछिल्लो सातामा पाँच दिन कारोबार हुँदा नेप्से परिसूचक चार दिन घट्यो भने एक दिन मात्रै सुधार भयो।
साताको सुरुवातमै दबाबमा परेको नेप्से सोमबार २६.२९ अंक घटेर २६२३.११ विन्दुमा झरेको थियो। मौद्रिक नीति आउने दिन मंगलबार भने बजार २४.५७ अंकले बढेर केही राहत देखिए पनि त्यसपछिका तीन कारोबार दिनमा पुनः गिरावट आयो। शुक्रबारसम्म आइपुग्दा नेप्से २६००.७८ विन्दुमा सीमित भएको छ।
समग्रमा साताभर नेप्से ५२.६१ अंकले घटेको छ। बजार परिसूचक घटेसँगै कुल बजार पूँजीकरण पनि ९० अर्ब ४१ करोड रुपैयाँले घटेको छ। अघिल्लो साताको अन्तिम कारोबार दिन ४५ खर्ब ५९ अर्ब रुपैयाँ रहेको बजार पूँजीकरण घटेर यो साता ४४ खर्ब ६८ अर्ब रुपैयाँमा सीमित भएको छ।
बजारमा गिरावट आए पनि कारोबार रकम भने बढेको छ। साताभर २४ अर्ब २५ करोड रुपैयाँभन्दा बढीको शेयर किनबेच भएको छ। औसत दैनिक कारोबार ४ अर्ब ८५ करोड रुपैयाँ पुगेको छ, जुन अघिल्लो साताको तुलनामा उल्लेख्य वृद्धि हो। यसले मूल्य घटे पनि लगानीकर्ताको कारोबार सक्रियता भने कायम रहेको संकेत गर्छ।
साताभर सूचीकृत १३ वटै उपसमूह घटेका छन्। बैंकिङ, हाइड्रोपावर, लघुवित्तलगायत अधिकांश क्षेत्रमा बिक्री दबाब देखिएको छ। यसले बजारको गिरावट कुनै एउटा समूहमा सीमित नभई समग्र बजारमा फैलिएको देखाउँछ।
लगानीकर्ताले मौद्रिक नीतिबाट ब्याजदर, तरलता र शेयर बजार सुधारसँग सम्बन्धित थप सकारात्मक संकेतको अपेक्षा गरेका थिए। तर नीति सार्वजनिक भएपछि पनि अपेक्षित उत्साह नदेखिएपछि बजार मनोविज्ञान कमजोर बनेको विश्लेषण गरिएको छ।
यसैबीच, नेपाल धितोपत्र बोर्ड (सेबोन) ले पूँजी बजार सुधारका लागि पहल थालेको जनाएको छ। बोर्डले बजार सुधार मार्गचित्र तयार गर्ने, कानुनी व्यवस्थाको पुनरावलोकन गर्ने तथा लगानीकर्ताको हित संरक्षणमा केन्द्रित हुने बताएको छ।
विश्लेषकहरूका अनुसार बजारको आगामी दिशा मौद्रिक नीतिको प्रभाव, तरलताको अवस्था, ब्याजदरको गति र नियामक निकायले ल्याउने सुधारका कदममा निर्भर हुनेछ। अहिलेको गिरावटलाई लगानीकर्ताको विश्वास परीक्षण गर्ने चरणका रूपमा हेरिएको छ।
