काठमाडौं । नेपालको शेयर बजार पछिल्लो समय लगातार ओरालो लागिरहेको छ । नेपाल स्टक एक्सचेन्ज (नेप्से) परिसूचक २६०० को बिन्दुमा झरेसँगै बजार ६ महिनायताकै न्यून स्तरमा पुगेको छ ।
नयाँ सरकार गठन र शेयर बजारमैत्री नीति आउने अपेक्षा गरिए पनि लगानीकर्तामा उत्साह देखिन सकेको छैन । बरु बजारमा निराशा बढ्दै गएको तथ्यांकले देखाएको छ ।
राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साहको नेतृत्वमा सरकार गठन भएपछि शेयर बजारमा सुधार आउने अपेक्षा गरिएको थियो । निर्वाचनअघि रास्वपाले आफ्नो वाचा पत्रमार्फत शेयर बजार सुधारका लागि विभिन्न नीति ल्याउने प्रतिबद्धता जनाएको थियो । तर, सरकार गठनपछि पनि बजारले सकारात्मक गति लिन सकेन ।
बालेन सरकारले शपथ ग्रहण गर्नुभन्दा अघिल्लो दिन अर्थात् चैत १२ गते नेप्से परिसूचक २ हजार ९५०.१६ बिन्दुमा पुगेको थियो । तर, त्यसयता बजार निरन्तर दबाबमा रहँदै आएको छ । पछिल्लो कारोबारसम्म आइपुग्दा नेप्से परिसूचक २ हजार ६ सयको आसपासमा झरेको छ ।
यस अवधिमा नेप्से परिसूचक करिब ३५० अंकले घटेको छ । बजारको यो गिरावटलाई पछिल्लो समयकै ठूलो करेक्सनका रूपमा हेरिएको छ ।
नेप्से २६०० बिन्दुमा झरेसँगै यो करिब ६ महिनायताकै न्यून स्तर बनेको छ । गत पुस ९ गते नेप्से २५९७ बिन्दुमा बन्द भएको थियो । त्यसपछि बजारले केही सुधार गर्दै चैत ११ गते २ हजार ९७० बिन्दुसम्मको उच्च स्तर छोएको थियो ।
तर, त्यसपछि भने बजारमा निरन्तर बिक्री चाप देखिएको छ । लगानीकर्ताको मनोबल कमजोर हुनु, नीतिगत स्पष्टताको अभाव, तरलता अवस्था तथा बजारप्रतिको विश्वासमा कमी आउनुले शेयर बजार दबाबमा परेको विश्लेषकहरूको भनाइ छ ।
सरकार परिवर्तनसँगै देखिएको अपेक्षित सकारात्मक प्रभाव बजारमा नदेखिएपछि अहिले लगानीकर्ताहरू आगामी नीति, मौद्रिक अवस्था र बजार सुधारका सम्भावित कदमतर्फ ध्यान दिइरहेका छन् ।
