काठमाडौं — साताको दोस्रो कारोबार दिन मंगलबार सेयर बजार सामान्य अंकले घटेको छ। कारोबारको सुरुवाती चरणमा सकारात्मक देखिएको नेपाल स्टक एक्सचेञ्ज (नेप्से) परिसूचक अन्तिम समयमा बिक्री दबाब बढेपछि ४.६४ अंकले घटेर २ हजार ६९६.६७ विन्दुमा बन्द भएको हो। सोमबार ३३.२८ अंकको उल्लेख्य गिरावट आएको बजारले मंगलबार पनि स्पष्ट पुनरागमन गर्न नसक्दा लगानीकर्ताको मनोबल अझै सावधानीपूर्ण रहेको देखिएको छ।
मंगलबार कुल ३४२ कम्पनीका १ करोड ४ लाख २१ हजार ८६३ कित्ता सेयर खरिदबिक्री हुँदा ४ अर्ब ४२ करोड ७३ लाख रुपैयाँभन्दा बढीको कारोबार भयो। अघिल्लो दिनको तुलनामा कारोबार रकम घट्नुले बजारमा लगानीकर्ताको सक्रियता केही कमजोर भएको संकेत गर्छ। बजार घटे पनि तीव्र बिक्रीको अवस्था भने देखिएन। परिसूचक सामान्य अंकले मात्र घट्नु र कारोबार रकमसमेत संकुचित हुनुबाट खरिदकर्ता र विक्रेताबीच तत्काल स्पष्ट दिशा तय हुन नसकेको बुझिन्छ।
यस दिन कारोबारमा आएका कम्पनीमध्ये ९८ वटाको सेयर मूल्य बढ्दा १६६ वटाको घट्यो। १३ कम्पनीको सेयर मूल्यमा कुनै परिवर्तन भएन। मूल्य घट्ने कम्पनीको संख्या बढ्ने कम्पनीभन्दा उल्लेख्य रूपमा बढी रहेकाले बजारको समग्र विस्तार भने कमजोर देखिएको छ। मुख्य परिसूचकसँगै सेन्सेटिभ, फ्लोट तथा सेन्सेटिभ फ्लोट परिसूचक पनि सामान्य घटेका छन्। यसले ठूला तथा बजार पुँजीकरणका हिसाबले प्रभावशाली कम्पनीमा समेत खरिदकर्ताको बल कमजोर रहेको देखाउँछ।
उपसमूहगत रूपमा बजारको प्रदर्शन मिश्रित रह्यो। कारोबारमा रहेका १३ उपसमूहमध्ये वित्त, होटल तथा पर्यटन, जलविद्युत् र व्यापार समूहका सूचक बढे। बाँकी नौ उपसमूह दबाबमा रहे। केही सीमित क्षेत्रका कम्पनीमा लगानीकर्ताको आकर्षण देखिए पनि बजारव्यापी रूपमा खरिद फैलिन नसकेको देखिन्छ। विशेषगरी बजारलाई प्रभाव पार्ने बैंकिङ, विकास बैंक, बीमा तथा अन्य ठूला समूहमा पर्याप्त सुधार नआउँदा नेप्सेले सकारात्मक दिशा समात्न सकेन।
मंगलबार एभरेष्ट कलर लिमिटेडको सेयर मूल्यमा सकारात्मक सर्किट लागेको छ। कम्पनीको सेयर मूल्य प्रतिकित्ता ११२ रुपैयाँ ३० पैसाले बढेर ८६१ रुपैयाँ पुगेको हो। बजार सामान्य घटेका बेला कम्पनीको मूल्य उच्च दरले बढ्नुले उक्त सेयरमा माग केन्द्रित रहेको देखाउँछ। यता कुथेली बुखरी स्मल हाइड्रोपावरको सेयर मूल्य सर्वाधिक ६.०७ प्रतिशतले घट्यो। कम्पनीगत मूल्यमा देखिएको यस्तो फरक चालले बजारमा समग्र सूचकभन्दा पनि कम्पनी विशेषका आधारमा कारोबार भइरहेको संकेत गर्छ।
कारोबार रकमका आधारमा सेन्ट्रल फाइनान्स शीर्ष स्थानमा रह्यो। कम्पनीको २७ करोड १४ लाख रुपैयाँभन्दा बढीको सेयर खरिदबिक्री भएको छ। त्यसपछि रिडी पावर र सोलु हाइड्रोपावरमा उच्च कारोबार भयो। वित्त र जलविद्युत् क्षेत्रका सीमित कम्पनीमा ठूलो रकम केन्द्रित हुनुले छोटो अवधिका कारोबारी सक्रिय रहेको बुझिए पनि दीर्घकालीन तथा संस्थागत लगानीको व्यापक प्रवेश भएको निष्कर्ष निकाल्न सकिँदैन।
२०० दिने औसत निर्णायक क्षेत्रमा
प्राविधिक रूपमा नेप्से परिसूचक पुनः २०० दिनको मुभिङ एभरेज अर्थात् ‘२०० एमए’ आसपास आइपुगेको छ। दीर्घकालीन बजारको प्रवृत्ति बुझ्न प्रयोग गरिने यो सूचकलाई लगानीकर्ताले महत्वपूर्ण समर्थन र प्रतिरोध क्षेत्रका रूपमा लिने गर्छन्। प्राविधिक विश्लेषक अजित खनालका अनुसार बजारले हालसम्म २०० एमएको क्षेत्रलाई समर्थनका रूपमा सम्मान गरिरहेको देखिए पनि यहाँबाट स्पष्ट उकालो गति लिन सकेको छैन।
पछिल्लो समय बजार बढेपछि चार्टमा सानो दायराका क्यान्डलहरू बन्न थालेका छन्। मूल्यमा ठूलो उतारचढाव नभई सानो सीमाभित्र कारोबार हुनुले खरिदकर्ता र विक्रेता दुवै पर्ख र हेरको अवस्थामा रहेको जनाउँछ। बढ्दो प्रवृत्तिपछि बजार साइडवेजमा जानु कहिलेकाहीँ अर्को वृद्धिको तयारी हुन सक्छ। तर कारोबार रकम घटिरहेको र बजारले बारम्बार माथिल्लो तहमा बिक्री दबाब सामना गरिरहेको अवस्थामा यस्तो चाललाई पूर्ण सकारात्मक संकेत मान्न सकिँदैन।
नेप्से २०० एमएभन्दा माथि टिकिरहेसम्म बजारको मध्यम तथा दीर्घकालीन सम्भावनाप्रति सकारात्मक अपेक्षा कायम रहन सक्छ। यो तहबाट खरिदकर्ताले बलियो प्रतिक्रिया दिएमा बजारले पुनः २७०० विन्दुमाथि स्थायित्व खोज्न सक्छ। तर २०० एमएको समर्थन स्पष्ट रूपमा तोडिएर परिसूचक लगातार त्यसभन्दा तल बन्द हुन थालेमा बजारको प्राविधिक संरचना कमजोर बन्न सक्छ। त्यस्तो अवस्थामा छोटो अवधिका लगानीकर्ताले जोखिम घटाउन बिक्री बढाउन सक्ने भएकाले गिरावट थप गहिरिने जोखिम रहन्छ।
२७०० विन्दुमा बारम्बार अवरोध
मंगलबार बजार केही ग्यापअपसहित खुलेको थियो। तर कारोबार सुरु भएको पहिलो मिनेटमै उक्त ग्याप पूरा भएपछि सुरुवाती उत्साह टिक्न सकेन। त्यसपछि परिसूचकले दिनभर २७०० विन्दु आसपासको क्षेत्र पटक–पटक परीक्षण गरे पनि त्यसलाई मजबुत रूपमा पार गर्न सकेन। मनोवैज्ञानिक रूपमा महत्वपूर्ण मानिने २७०० विन्दुमाथि बजार टिक्न नसक्नुले उक्त क्षेत्रमा आपूर्ति तथा बिक्री दबाब अझै बलियो रहेको देखाउँछ।
कारोबारको अन्तिम चरणमा बजार घट्ने पछिल्लो प्रवृत्ति मंगलबार पनि दोहोरियो। करिब दिउँसो १ः५४ बजेदेखि बिक्री आदेश बढ्दा नेप्से कारोबार रकमसहित ओरालो लागेको थियो। विशेषगरी २ बजेपछि परिसूचकमा आएको कमजोरीले दिनभरको बजार दिशा अन्तिम एक घण्टाको कारोबारले निर्धारण गरिरहेको संकेत गर्छ। बजारको सुरुवाती वा मध्य चरणमा आएको सुधार अन्तिम समयमा टिक्न नसक्नु तत्कालका लागि खरिदकर्ताको आत्मविश्वास कमजोर रहेको प्रमाण हो।
कारोबार रकम घटे पनि ठूला १० ब्रोकरको खरिदबिक्री विवरणले केही सकारात्मक संकेत दिएको छ। तीमध्ये सात ब्रोकरको खरिद मात्रा बिक्रीभन्दा बढी रहेको देखिएको छ। यसले बजारका केही ठूला सहभागीले वर्तमान मूल्यस्तरमा सेयर संकलन गरिरहेको सम्भावना देखाउँछ। यद्यपि ब्रोकरको कुल खरिद मात्राका आधारमा मात्र बजारको आगामी दिशा निश्चित गर्न सकिँदैन। खरिद कुन कम्पनीमा केन्द्रित छ, ती सेयरको बजार पुँजीकरण कति छ र खरिद दीर्घकालीन हो वा छोटो अवधिको कारोबारका लागि हो भन्ने विषयसमेत महत्वपूर्ण हुन्छ।
लगानीकर्ता अझै पर्ख र हेरको अवस्थामा
समग्रमा नेप्से अहिले २०० दिने मुभिङ एभरेजको समर्थन र २७०० विन्दुको मनोवैज्ञानिक प्रतिरोधबीच सीमित भएको छ। तलतर्फ २०० एमएले बजारलाई जोगाइरहेको छ भने माथितर्फ २७०० विन्दुमा बिक्री दबाब देखा परिरहेको छ। यी दुई तहबीचको उतारचढावले तत्काल बजारमा स्पष्ट प्रवृत्ति विकास नभएको देखाउँछ।
आगामी कारोबारमा नेप्सेले २७०० विन्दुमाथि पर्याप्त कारोबार रकमसहित बन्द हुन सकेमा खरिदकर्ताको आत्मविश्वास बढ्न सक्छ। त्यसले छोटो अवधिमा बजारलाई थप माथिल्लो प्रतिरोधतर्फ अघि बढ्ने आधार दिन सक्छ। तर २०० एमएभन्दा तल लगातार कारोबार हुन थालेमा प्राविधिक बिक्री बढ्ने र बजार थप दबाबमा पर्ने जोखिम रहनेछ।
हालको कारोबार गतिविधि, कम्पनीहरूको मूल्य विस्तार र बजारको अन्तिम घण्टाको चाल हेर्दा लगानीकर्ता तत्काल आक्रामक खरिदमा जानेभन्दा पनि महत्वपूर्ण प्राविधिक तहको प्रतिक्रिया पर्खिरहेका छन्। त्यसैले आगामी एक–दुई कारोबार दिनको बन्द विन्दु, कारोबार रकम र २७०० आसपास बजारले देखाउने व्यवहारले नेप्सेको छोटो अवधिको दिशा निर्धारण गर्ने देखिन्छ।
