बिजुली गाडीको आयात बढ्यो, बजेटले मूल्य बढाउला ?

बजेटले भन्सार र कर बढाउने हल्ला चलेपछि गत वैशाखमा बिजुली गाडीको आयात बढेको छ। भन्सार विभागका अनुसार वैशाखमा १,४०४ वटा विद्युतीय गाडी आयात भएको छ। गत चैतको तुलनामा यो दोब्बरभन्दा पनि धेरै हो। चैतमा ६५८ वटा बिजुली गाडीको आयात भएको थियो।

आगामी जेठ १५ गते सरकारले आर्थिक वर्ष २०८१/८२ को बजेट सार्वजनिक गर्दै छ। सरकारको राजस्व घटेका कारण राजस्व बढाउन विद्युतीय गाडीको कर बढाउने चर्चा छ।

सरकारले कर सहुलियत दिएका कारण पछिल्ला वर्षहरूमा विद्युतीय सवारीसाधनको आयात बढिरहेको छ। चालू आव २०८०/८१ को वैशाखसम्ममा मात्रै ८,४९७ वटा विद्युतीय गाडी नेपाल भित्रिएका छन्। यो अघिल्लो आवको तुलनामा दोब्बरभन्दा पनि धेरै हो। आव २०७९/८० भरिमा चार हजार ५० वटा बिजुली गाडी नेपाल भित्रिएका थिए।

अहिलेसम्म नेपालमा २६ हजारभन्दा धेरै चारपांग्रे बिजुली गाडी भित्रिएका छन्। खासगरी, सरकारले कर छूट बढाएका वर्ष विद्युतीय सवारीसाधन बढी आयात भएको तथ्यांकले देखाउँछ। यस्तै, तत्कालीन अर्थमन्त्री डा. युवराज खतिवडाले आव २०७७/७८ को बजेट मार्फत विद्युतीय गाडीको कर बढाएपछिका दुई वर्षमा बिजुली गाडीको आयात सुस्त भएको थियो।

करको दरको हेरफेरले बिजुली गाडीको आयातमा प्रभाव पर्दै आएको छ। नेपालले बिजुली गाडीमा दिएको कर छूटले वातावरण प्रदूषण कम गर्न सघाउने भएकाले यसलाई निरन्तरता दिन वातावरणवादीहरूले माग राख्दै आएका छन्।