शेयर बजारका विज्ञ र विश्लेषकलाई लाइसेन्स दिने तयारी

नेपाल धितोपत्र बोर्डले धितोपत्र बजारमा विज्ञ र विश्लेषकलाई लाइसेन्स प्रदान गर्ने गरी निर्देशिका ल्याउने तयारी गरेको छ। पछिल्लो समय शेयर बजारमा विज्ञ र विश्लेषकको भूमिकाबारे व्यापक चर्चा भइरहेको बेला बोर्डले यस्तो कदम चालेको हो।

बोर्डले विशेष समिति गठन गरेर विज्ञ र विश्लेषक चिन्ने तथा उनीहरूको गतिविधिलाई नियमन गर्ने योजना बनाएको छ। सामाजिक सञ्जालमा हुने अबाञ्छित गतिविधिलाई निरुत्साहन गर्ने र लगानीकर्तालाई ठगीबाट जोगाउने उद्देश्यले यो निर्देशिका ल्याउन लागिएको हो।

भारतलगायतका देशमा विज्ञ र विश्लेषकलाई लाइसेन्स प्रदान गर्ने प्रणाली भएको र तिनीहरूको रोस्टर समेत तयार गरिने प्रचलन छ। नेपालमा पनि यस्तै प्रणाली लागू गर्नुपर्ने आवाज उठ्दै आएको छ।