काठमाडौँ । स्नो रिभर्स लिमिटेडले सर्वसाधारणका लागि आईपीओ निष्काशन गर्ने मिति तय गरेको छ। कम्पनीले आगामी बैशाख २९ गतेदेखि सर्वसाधारण लगानीकर्ताका लागि साधारण शेयर बिक्री खुला गर्ने भएको हो। यसअघि आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि निष्काशन गरिएको शेयर बाँडफाँट सम्पन्न भइसकेपछि अब दोस्रो चरणमा सर्वसाधारणलाई लक्षित गर्दै आईपीओ खुलाउन लागिएको हो।
कम्पनीले जारी पूँजी ९३ करोड ७५ लाख रुपैयाँको २० प्रतिशत बराबर १८ लाख ७५ हजार कित्ता शेयर निष्काशन गर्ने अनुमति पाएको थियो। सोमध्ये ९ लाख ३७ हजार ५०० कित्ता स्थानीय बासिन्दाका लागि र ९३ हजार ७५० कित्ता विदेशमा रोजगारीमा रहेका नेपालीहरूका लागि छुट्याइएको थियो, जुन वितरण भइसकेको छ। त्यसैगरी, ४६ हजार ८७५ कित्ता सामूहिक लगानी कोष र १८ हजार ७५० कित्ता कर्मचारीहरूका लागि पनि छुट्याइ बाँडफाँट गरिएको कम्पनीले जनाएको छ।
अब बाँकी रहेको ७ लाख ७८ हजार १२५ कित्ता शेयर सर्वसाधारणका लागि निष्काशन गर्न लागिएको हो, जसको कुल मूल्य ७ करोड ७८ लाख रुपैयाँभन्दा बढी हुन्छ। प्रतिकित्ता १०० रुपैयाँ अंकित मूल्यमा जारी हुने यस आईपीओमा लगानीकर्ताले न्यूनतम १० कित्ता र अधिकतम १ हजार कित्तासम्म आवेदन दिन सक्ने व्यवस्था गरिएको छ। निष्काशन छिटोमा जेठ १ गतेभित्र बन्द हुनेछ भने पूर्ण आवेदन नपरेमा जेठ १२ गतेसम्म खुला रहनेछ।
कम्पनीको आईपीओलाई इक्रा नेपालले ‘डबल बी प्लस’ (BB+) रेटिङ प्रदान गरेको छ, जसले कम्पनीको दायित्व वहन गर्ने क्षमतामा मध्यम जोखिम रहेको संकेत गर्दछ। यस्तो रेटिङले लगानीकर्तालाई सम्भावित जोखिमबारे सतर्क रहन सुझाव दिने भए पनि विकास चरणका जलविद्युत कम्पनीहरूमा यस्तो स्तरको रेटिङ सामान्य मानिन्छ।
स्नो रिभर्स लिमिटेडले सञ्चालन गरिरहेको १३.५ मेगावाट क्षमताको सुपर काबेली खोला ‘ए’ जलविद्युत आयोजनामा कुल २ अर्ब ७१ करोड रुपैयाँभन्दा बढी लगानी गरिएको छ। प्रतिमेगावाट लागत करिब २० करोड रुपैयाँभन्दा माथि रहेको छ, जुन नेपालको सन्दर्भमा मध्यम–उच्च लागत मानिन्छ। आयोजनाको विद्युत उत्पादन अनुमति अवधि अझै ३१ वर्षभन्दा बढी बाँकी रहेकोले दीर्घकालीन आम्दानी सम्भावना रहेको देखिन्छ।
आर्थिक विश्लेषणका हिसाबले हेर्दा आयोजनाको साधारण लगानी फिर्ता अवधि ८.१७ वर्ष रहेको छ भने डिस्काउण्ट आधारमा १५.७७ वर्ष लाग्ने अनुमान गरिएको छ। यसले छोटो अवधिमा नगद प्रवाह स्थिर हुन सक्ने संकेत गरे पनि पूर्ण लाभ प्राप्त गर्न भने लामो समय कुर्नुपर्ने देखिन्छ।
आईपीओ निष्काशन तथा बिक्री प्रबन्धकको रूपमा सानिमा क्यापिटल लिमिटेड रहेको छ। लगानीकर्ताले नेपाल धितोपत्र बोर्डबाट अनुमति प्राप्त बैंक तथा वित्तीय संस्थाहरू र तिनका शाखामार्फत सी–आस्बा प्रणाली प्रयोग गरी आवेदन दिन सक्नेछन्।
