माघमा वाणिज्य बैंकहरूको ब्याजदर थप घट्यो, तरलता प्रशस्त हुँदा बैंकहरू दबाबमा
माघमा वाणिज्य बैंकहरूको ब्याजदर थप घट्यो, तरलता प्रशस्त हुँदा बैंकहरू दबाबमा काठमाडौं । माघ महिनाका लागि वाणिज्य बैंकहरूले सार्वजनिक गरेको नयाँ ब्याजदर तालिकाले बैंकिङ प्रणालीमा तरलता अत्यधिक रहेको स्पष्ट संकेत गरेको छ। सञ्चालनमा रहेका २० वाणिज्य बैंकमध्ये १२ बैंकले पुसको तुलनामा माघमा निक्षेपको ब्याजदर घटाएका छन् भने ७ बैंकले व्यक्तिगत मुद्दती निक्षेपमा दिने अधिकतम ब्याजदर यथावत् राखेका छन्। यसबीच प्राइम कमर्सियल बैंकले भने अपवादका रूपमा ब्याजदर बढाएको छ। पुस महिनामा व्यक्तिगत मुद्दती निक्षेपको अधिकतम ब्याजदर ५.५५ प्रतिशतसम्म पुगेको थियो। तर माघमा यस्तो अधिकतम दर घटेर ५.५ प्रतिशतमा सीमित भएको छ। त्यस्तै, पुसमा औसत ब्याजदर ४.८५ प्रतिशत रहेकोमा माघमा घटेर ४.७ प्रतिशतमा झरेको छ। यसले बैंकिङ प्रणालीमा कर्जा माग कमजोर रहेको र निक्षेप परिचालनमा बैंकहरूलाई चुनौती बढ्दै गएको देखाउँछ।
